JC.Zoremi Hmar Joute
-- Advertisement --
Hman lai naupangte kha eng tiangin nge an lo khawsak a, eng tiangin nge pan lai nun an lo hman ve thin… kan tun lai khawvel nen chuan inthlau deng deng tak a ni; khai mah aw!
Mipa naupang:
Thing nawi keuh
Hman lai, British mi ten kan ram an lak hma chuan khua hi lian pui pui a ni a, khaw khatah hian zawlbuk pahnih pathum…pali panga te a awm thin. Zawlbuk tinah chuan naupangin thingnawi an keuh thin a,thingtang ro hi ui pum tia tiain an ve têl a, naupang tinin tel hnih tel thum tein zan tin an keuh thin a ni. Sikul te a la awm lo bawk a, hei hi naupang thununna leh sawizawina ber a ni a, naupang zawng zawng kum 14 hnuai lam chu, Lal fa tih chauh lo chu keuh vek tura ngaih an ni.
Zan hnih zan thum danah hian an inko khawm a, an inzawt chhuak vek a, tumah an awl ru thei mang lo. Awl ru lo awm se la, an hriat chhuah chuan tel tam tak an keuhtir a, an sim leh zel; inthununna tha tak a ni.
Inchil thu:
Zawlbuk hrang kha chu veng hrang zawlbuk a ni a, veng tin naupang kha inbuanah an incho thin a; veng tinah khan buan vai an chhep a, (“Buan vai an tih chu Thurpui hrui lian tak, ban puam tia lai, sei tak an va la a, chu chu hmun zawl rem lai deuhah an kual a, zau tak hlamthum tlain, tah chuan favai hraw an chhung teuh a, tluk leh inkeuh pawhin a na vak thei lo va, inbuanna hmun ber a ni a, chuvang chuan “Buan vai,” an ti a ni) Buan vai hi veng tinah a awm theuh a, tah chuan an inbuan thin a, an en huai huai thin.
Veng khat chil tur khan veng dang naupang zawng zawng kha an hotu tlangvalte nen khan an kal a, kal pahin inchil hla an sa dup dup mai a, nuam an ti thin hle. An inchil hlate chu;
Kulhpui phena Changsial dan lai a,
Kan lo lian e, min dang zo lo ve
Min dang zo lo ve
tih te leh a dangte sain an ri hut hut zel mai a, inbuan thiam deuh leh chak deuh kha chu inbuan châkin an za an za mai tawh thin a ni. Hetianga naupan lai inchilnaa buan thiamte kha chu an tlangval hunah pawh tlangval buan thiam an lo ni a, khaw khat hawlh lawr te pawh an lo ni thei thin a ni.
Sabebuh ngen
Mipa naupang chu zawlbuk thingnawi tumtu kha an nih avangin, chawng leh lam, Sechhun khuangchawi an awm phawt chuan sabebuh kha an pual a ni ve thin a ni. Chawngah kha chuan sabebuh chu vawkpui sa buhchiar a ni thin a, khuangchawi meuhah khan erawh chu sepui, ‘Thingphal’ an tih sa kha a ni a, buhchiar pawh a ni lo a, ruai dang ang deuh mai bawk a ni a, sabebuh ti lovin ‘Mual buh’ an ti thin.
Naupangho chu tlai dar hnih velah zawlbukah an inko khawm a, sabebuh ngen turin an hotute nen a hlawpin hla sa chungin an lo kal a, Chawng In kha an rawn pan a, an hla chu:
Chawngnu Chawngpa lo tho rawh.
Sum dêng rualin zu kan nei lo ve,
Sa kan nei lo ve! tiin.
Chawng In an lo thlen chuan in kha an sâwi ta a, a tluk hlauhawm khawpin an sawi nghing thei! Tah chuan Chawngpain emaw, fatuho te pawhin, “E! Zah ngai rawh u, kan rawn pe thuai dawn che u,” tiin an lo thlêm dai thin; chu chu naupangin Chawng leh làm zâr an zo vena a ni.
Pawnto:
Hman lai Mizote chu, lehkha zir te ala awm lo bawk a, a pui a pangin pawnto hi an uar hle mai a. =hâl lai thla en zan te chuan khawlaiah hian an ri mar mar thin a ni. Paho pawh hi thla en loh zan te pawhin khawlaiah hian awmtual mei an chhem a, tah chuan an thu khawm a, rei tak tak an pawnto thin. Mipa naupang pawnto hla deuh ber chu
Zawnga leihlawn dim dim,
Chhim zawng leihlawn zawngchal leihlawn,
Zawnga leihlawn dim dim.
tih te…
Lai lut e lai lut e,Sial lai lut e lai lut e,
Kawt lo hawn kawt lo hawn,
Sial kawt lo hawn, kawt lo hawn…
tih te hi a ni.
Hmeichhe naupang:
Vantlang hna:
Hmeichhe naupang hi chu vantlang nunah hian an tel lo hle mai a, lian deuh tawh tak, thing phur a, tui chawi thei àwm rual kha chu Chawng buh dengah te, Chawng thing phurhah pawh an thawk ve tawh thin. An tet te-a in chhung rawng bawla chhawr an nih avangin mipa naupang angin vantlang zingah chanvo an ngah ve lo a ni.
Pawnto:
Pawnto hi erawh chu hmeichhe naupang pawh thal lai thla en zanah te chuan an pawnto ve hle a, hla chham-mi hrang hrang te sain an hlim ve hle thin. “Lenthul,” an ti a, mi pahnih hi an banrekah nghet takin an invuan a, an ke lam kha inhnaih deuhin; an ban mar tawkin an inpawt a, an inlen vak thin a, chu chu ‘Lenthul’ an tih ber chu a ni. Chutia an inlen vak a tlu bik kha chu thiam lovah an ruat a, an innuihsan thin.
An lenthul hlaa chang tawpna;
Ka Sial haw rawh siri
Dullai Sial aw Vankal Sialin,
A len ruai e lai tum bak.
Tih thu-ah hian, Dullai Sial leh Vankal sial hi an rawn hmang leh a, tak tak pawh a va ni ta awm mai mang e ka ti. Dullai leh Vankal hi khaw hran an ni a, Sepa lian tak an nei ve ve a, chu chu Dullai Sial leh Vankal Sial tih an ni ta mai a ni. Dullai chu Hliappui khaw kiangah khian a awm a, Vankal chu “Vankal tlang,” kan tih tak khi a ni a, an inhlat deuh angreng hle mai. Vankal Sial chu a te zawk a, mahse sepa lian tak chu a ni tho a. Dullai Sial chu lian leh zual a ni a, “In chunga dingin chi an liah thin,” an ti!
Vankal Sial chuan Dullai Sial chu a len em avangin a ngam thin lo va, Vankal Sial chu a rawl bo ta vang vang mai a, khawthlang kila ‘Chipui’ an tih chu a zuk tlàn a, kum khat a tlan hnu chuan a thau mum káng tawh mai a. A haw chho leh ta vang vang a, “Luipui kân hlek lovin a khànah zel a kal e;” an tia lawm! Tichuan Dullai sial chu a inrin loh hlanin a bei thut mai a, a si thlu a, a tilmu a seh kehsak a, a thi ta a ni, an ti.
Hman lai naupang chanchin kha tun lai naupang zingah hian sawi ta ila, mak an tih fe fe tur te, an khawngaih em em tur leh an hlauh tur thil tam tak leh an hlimpui tur tam tak a awmin ka ring a, hman lai thil tam tak, in chhung bungrua te, an khawsak dan tam zawk chu mitthlà dan tur ringawt pawh an hriat loh tur an ni hlawmin ka ring e!