Hmarcha leh sawhthing eipawlhin cancer risk tihniam thei

Hmarcha leh sawhthing eipawlhin cancer risk tihniam thei
Hmarcha thak ngam tak i nih chuan chanchin lawmawm a awm tlat mai. Mithiam ten zirchianna an neih a an hmuh danin hmarcha leh sawhthing eipawlh hian cancer risk a tihniam thei an ti tlat!
Tunhma deuha zirchianna an lo neih tawhah hmarcha ti thaktu capsaicin chu cancer thlen thei angin an sawi thin a, mahse, tunah chuan American Chemical Society-a mithiam ten chaihchim-a zirchianna an neihah chuan sawhthing a compound awm, 6-gingerol chuan capsaicin hnathawh hlauhawm a lo do let thei a, tichuan capsaicin leh 6-gingerol an inchawhpawlh chuan cancer risk a tihniam thei niin an sawi.
Hmarcha leh sawhthing hi kan chawhmeh lar tak a ni a, hmarcha thatna sawi tur chi hrang hrang a awm laiin, thenkhat chuan capsaicin hian pum cancer a thlen thei niin an sawi a, mahse, sawhthing erawh hriselna atana a pawi theihna hriat tur a la awm rih lo.
Researcher Jiahuan Li, Gangjun Du leh an thawhpui te chuan he thil hi la zirchian zel a pawimawh thu an sawi a, tuna chaihchim hmanga zirchianna an neihah chuan chaihchim chuap (lung) cancer nei mai tur te chu capsaicin ringawt leh 6-gingerol ringawt eitir an nei a, chubakah chainchim dang chu capsaicin leh 6-gingerol an eipawlh tir ve thung a, capsaicin leh 6-gingerol eipawlh chaihchim zingah cancer an tlem zawk tih an hmuchhuak ta niin an sawi.
He zirchianna chungchang hi Journal of Agricultural and Food Chemistry-ah tarlan a ni.