Hmarchhak state CSR hnuhluh tam theih dan tur sawikhawm

Hmarchhak state CSR hnuhluh tam theih dan tur sawikhawm
Confederation of Indian Industries (CII) buatsaihin Nilaini khan New Delhi-ah ‘North East CSR Connect 2025’ hman a ni a. Minister Lalnghinglova Hmar chu khualzahawm a ni.
Minister chuan Mizoram chu state lian lo leh mihring tlemna, CSR (corporate social responsibility) pawh dawng tam lo tak state a nih laiin, CSR fund hmanna tur tak state a ni a, mipui kan tlem avangin investment pawh a langsar hma a, awmzia a nei bik thin tih a sawi. CSR hmanga hmasawnna ngelnghet thlen tura Mizoram leh Northeast lam hawi turin a sawm a ni.
Mizoram-in CSR Cell felfai tak a nei a, chief minister office atanga vil a ni tih a sawi a. Mizoram-a CSR invest duhten awlsam, langtlang leh awmze nei zawka an kalpui theihnan ‘Mizoram CSR Connect’ chu hman theiha peihfel tep a ni tawh tih a sawi bawk.
Mizoram leh India hmarchhaka CII hmalakna sawiin, Mizoramah CSR Conclave buatsaih turin CII hotute a sawm a ni.
Mizoram-in sports leh skill development kaihkawp tumin ruahmanna thui tak a siam tawh tih Lalnghinglova Hmar hian a sawi a, chumi hawi zawnga CSR fund hmang turin corporate-te chu a ngen a ni.
DoNER minister Jyotiraditya Scindia chuan video message kaltlangin thu a sawi a. CII buatsaih ‘CSR Investment in Northeast India: Understanding Barriers and Way Forward’ tih a tlangzarh nghal.
Mithiam thlan bikten thupui thlan sa hmanga an thu buatsaih chu sawiho a ni a. Hmarchhak state hrang hrang aiawhten an state theuha CSR invest-na atana pawimawh bik nia an ngaihte an sawizau a, Mizoram aiawhin Mizoram State Sports Council secretary Henry C Lalrawnkima’n a sawi a ni.
Confederation of Indian Industries-ah hian direct member hi company 9700 vel awmin, indirect member 365000 vel an awm mek a. CSR Connect hi Northeast-a CSR tam zawk invest a nih theihnana buatsaih niin, kumin hi a vawihnihna a ni. 2024 July 3&4 khan New Delhi-ah tho a vawikhatna atan neih a lo ni tawh.