Hmarchhak state hoin hnianghnarzawka power supply neih dan rel

Hmarchhak state hoin hnianghnar
zawka power supply neih dan rel
North Eastern Regional Power Committee (NERPC) meeting vawi 29-na chu Zirtawpni khan Guwahati-ah neih a ni a, Mizoram Power & Electricity minister F Rodingliana a tel.
Power minister chuan hmarchhak state-ten NERPC kaltlanga power sector hnuaia hmasawnna tur an thlente nasa zawka nawr a tul tih a sawi a. Nikuma NERPC thutkhawma thurel, Small Hydro Incentive Scheme for North East-Ministry of New & Renewable Energy hnuaia hydel project megawatt 24 chin siamna tur tanpuina pek thin tihtawp tak chhunzawm tura sawrkar laipuia thlen, tun thlenga a hlawhtlinna hmuh la ni lo chu nasa zawka nawr tul a tih thu a sawi.
Tun tum thutkhawma rel Net Present Value (NVP) chungchanga central-a thlen tur pawh nasa taka bawhzui tlang turin NERPC member-te a sawm a. Kumin December-a Mizoram-in NERPC thutkhawm a thlen huna tel theuh tur leh hunpui Krismas vuakvet boruak chhim turin a sawm a ni.
NERPC thutkhawmin a kentel Technical Core Committee chu July 17 khan an thukhawm nghal a. An thurel zingah – Forest Conservation Act 1980 hnuaia forest ram tihchhiat avanga sum tam tak chawi ngai thin, NPV chu a bikin hmarchhak state-te hmasawnna ruhrel siam kawnga harsatna thlentu a nih avangin sawrkar laipuia thlen nise tih a ni.
NERPC hi India hmarchhak state 7-ten power supply hnianghnar leh rintlak an neih theihnan Electricity Act 2003 hnuaia din a ni.