Hmarchhak state-ten thuk zawkin ASEAN ram thawhpui duh tlang

Hmarchhak state-a legislator-te chuan ASEAN ram nen sumdawnna leh thil dangah thuk zawka thawhho an duh tlang a. DoNER ministry leh NEC chu inhne rem taka a kal theih nan Parliament-ah Standing Committee hran siam tura ngen an rel bawk. Aizawla nghah Commonwealth Parliamentary Association (CPA) India Region Zone-III 21st Annual Conference a ni hnihna atan Inrinni khan plenary session an nei leh a, “Project hrang hranga ruahhmanna leh thawhhona tha zawk a awm theih nan DoNER ministry leh NEC chhunfin” an sawiho.
CPA India Region Zone-III chairman, Nagaland Assembly speaker Sharingain Longkumar kaihhruai plenary session-ah hian Rajya Sabha deputy chairman Harivansh Narayan Singh chu a hma nia an thu khel “India – ASEAN hmathlir sumdawnna leh thawhhonaa hmarchhak state ho telh dan” a tuihnih hnu ah thupui thar zawk a sawihawng.
CPA member-te hian project hrang hranga ruahmanna leh thawhhona tha zawk a awm theih nan Ministry of Development of North Eastern Region (DoNER) leh North Eastern Council (NEC) chhunfin chu a that zawkna emaw that loh zawkna emaw sawiin, resolution an siam.
India-ASEAN Vision for Trade and Cooperation hnuaia Northeast Region-ah tel ve nise, an ti a. Prime minister kaihhruai sawrkar laipuiin Northeast Region hmasawn nana ‘Act East Policy’ a kalpui chu tha tiin, hemi tichaka hmalakna zau zawk neih theih nan Northeast Region chu India-ASEAN bilateral trade agreement-a telh a, international border chhawr tangkaia India ram thanna tha tichaktu a nih theih nan hma lak nise tih a ni.
India -Myanmar – Thailand Highway leh Kaladan Multi Modal Transit Transport Project zawhfel thuai tura hma lak, international trading outpost neih mek Moreh (Manipur), Zokhawthar (Mizoram) Pangsha leh Avangkhu (Nagaland) leh Pangsu Pass (Arunachal Pradesh) leh a dangte thuamchak nise; NE Region chu khual hip kawnga theihna nasa tak nei, hnam ziarang leh nunphung hrang hrang awmna a nih avangin hemi chawilar leh hmasawnna ruhrel siam kawngah theihtawp chhuaha hma lak nise, hmuntin tuama eizawnna siam tura tan lak nise, an ti.
NE Region leh ASEAN ram inkarah insumdawnna leh thawhhona tha zawk siam theih nan Cultural Exchange Program neih an rel bawk.
Hei bakah hian NE Region-a hmasawnna ruhrel pawimawh awmze nei zawka thlunzawm leh ruahmanna awlsam zawk siam a nih theih nan DoNER ministry leh NEC chhunfin pawh ngaihtuah a ni a. DoNER leh NEC kaltlanga scheme leh policy-te tha taka kalpui a nih a, inhne rem lo a awm loh nan a hranpa in ministry tan chauh Parliament-ah Departmental Related Standing Committee (DRSC) hran siam tura rawtna thlen nise, an ti a. NE Region atanga MP intelkhawmte India sawrkar bakah Lok Sabha speaker leh Rajya Sabha chairman te a hma thei ang bera sawipui tura biak nise, an ti.