Hmarchhakah ruah kaihhnawihah thi tam tawh
India hmar lamah khaw lum leh vaivut thli tleh avanga harsatna a thlen mek laiin hmarchhak lamah erawh ruah tam lutuk leh tui lian avangin buaina a thleng mek a, mi 30 chuang thi an awm tawh.
Thawhtannia thuneitute leh chanchinbuten an tar lan dan chuan India hmarchhakah hian ni li liam ta chhunga ruah sur nasa tak avanga tui lian leh lei min avangin mi 30 chuang an thi tawh a ni.
Reuters-in thuneitute hnen atanga a dawn a tihchhuahah chuan hmarchhaka ruah sur nasa kaihhnawiha thi hi mi 34 vel an ni tawh.
Sikkim-ah chuan Chhaten-a lei minin sipai camp a chhilhah sipai pathum an thi a, sipai paruk chin an la hre lo niin sipai hotuin a sawi.
Lei hi Pathianni zan dar 07:00 vela ruah nasa tak a sur hnua Mangan district, Lachen khaw bul lawka thleng a ni a. Ruang pathum an hmu tawh a, mi dang pali chu hliam tenau deuh tuarin an la chhuak a, sipai paruk erawh an chin an la hre tih defence thuneituin a sawi.
Sikkim-ah hian lei minin kawng a dan avanga tangkhang mi sang chuang an awm a, heng zinga a tam zawk hi chu lak chhuah tawh an ni a, eng emaw zat erawh che sawn thei lovin an la awm.
Assam-ah chuan tui lian avangin mi 10 vel an thi tawh a, hetih lai hian ruah tla a tlem deuh hret hnuah Thawhtanni chawhnu atang khan tui hi a kâm tan a, hmun tam tak erawh a la chim.
India Meteorological Department hnuaia Guwahati-a Regional Meteorological Centre (RMC) chuan tun kar hian Assam hmun tam zawkah ruah a la sur thei tih a sawi a. Hmun thenkhatah phei chuan tam tham tak a la sur dawn niin a sawi lawk bawk.
Arunachal Pradesh-ah Indian Air Force (IAF) chuan Lower Dibang Valley-a Bomjir River lian avanga tangkhang mi 14 chu Humanitarian Assistance & Disaster Relief (HADR) beihpui thlakin an chhanchhuak a. Heng mite hi tui lian nasain a dante niin IAF Mi-17 helicopter hmanga lak chhuak an ni.
Hmarchhakah ruah kaihhnawihah thi tam tawh
Get real time updates directly on you device, subscribe now.