Hmasawn chunga chak zo lo United

Nilai zan khan Reuben Amorim an ban hnuah a vawi khat nan Manchester United chu Darrent Fletcher enkawlna hnuaiah an inlan. Fletcher hnuaiah United in hma an sawn a, an khel pawh a hmuhnawm sawt. Hmasawn leh hmuhnawm sawt chungin United hian table hnuai ber dawttu a awm mek Burnley an hneh zo chuang lo thung.
United manager lailawk Fletcher-a’n tlarhnungah player pali a dah a, midfield-ah panga rem thawt bawkin tlarhmaah Benjamin Sesko a mal tlat tir. Fletcher hian Sesko thiam dan leh hlauhawm dan a man nghal a, tlarhmaah Nghalchang ang maiin a mal tlat tir ngam. A pu tharin a chunga rinna a nghat ngam chu Sesko pawhin goal hmangin a chhang let a, United a zawm hnua a vawi khat nan game khatah goal hnih a thun. Goal hnih thun bawk mah se point thum erawh an hlawhchhuak zo bik lo.
Burnley hian Turf Moor-a an mikhual Manchester United lakah bul an tan tha a, goal thawkchhuak hmasa zawkah an tang. Inkhel tan atanga minute 13-na lekah United defender Ayden Heaven chuan Hunphreys cross chu an lamah a dang pial lut a, Burnely in hma takah goal an thawkchhuak. Own-goal hmangin hmahruai bawk mah se Burnley an kut zalah goal an thun thei bik lova, 1-0 a hmahruai chungin chawlhlawk an hmang.
Chawlhlawk hmain goal thun thei lo mah se chawlhlawk hnu lamah United in goal an thu ta thuai. Fuh taka Burnley tlarhnung an thiat a, Bruno Fernandes ball pek fing tak atangin manto taka an lak luh Benjamin Sesko chuan fuh zetin a pet goal a, minute 50-naah an si phurh a sut.
An si phurh an sut vangin United an phur thar a, na zawkin an khingpuite an nawr chhunzawm nghal zat a, goal pawh an thawkchhuak leh thuai. Dorgu cross tha tak chu Sesko chuan chiai hauh lo, fuh leh class zetin a pet goal a, minute 60-naah hma an hruai letna goal a thun Reuben Amorim hnuaia beisei phak lo Sesko kha Fletcher hnuaia tha takin a inlan a, goal hnih a thun ta hial bawk. Chhawr a nih a, ball tha a hmuh phawt chuan goal thun a la thiam reng tih Sesko hian a lantir.
An mualah an hnufual zawk an nih hnuin Burnley in point hmuh ngei tumin tan an khawh thar leh nghal. Teal lian zawk lakah goal chhuah zawnin, hnufual zawk ni bawk mah se an hnual mai lo, an zam lova, an buai hek lo. Goal an chhuah atanga minute ruk hnu lekah a, Jaidon Anthony chuan fuh zeta pet goal in an si phurh a sut. 2-2 a nih hnuin inkhel a hmuhnawm zui viau naa goal lut a awm belh thei tawh lova, Burnley leh an mikhual Manchester United te chu an inhnehtawk zui ta a ni.
United lakah tlawm pumpelh mah se Burnley hian 19-na an luah chhunzawm a, dinhmun him lo takah an ding chhunzawm zel. Khelh 21 atangin point 13 chauh an la hmu a. A him chin chiaha awm Nottingham Forrest nen point 11 laiin an inthlau tawh a, tlakhniam an hnaih viau rih. Manager lailaw Darrent Fletcher hnuaia chak zo lo United in khelh 21 atangin point 32 an hmu a, pasarihna an luah ve thung.
Fletcher engtin zel
Manchester United chuan an ban tak Reuben Amorim hmunruak luah lailawktu atan an midfielder hlui leh an under 18 team enkawl mektu Darrent Fletcher an ruat. Chak zo bik lo mah se Fletcher hnuaiah hmuhnawm zawkin an inlan nghal. Engtik chen nge Fletcher hian a kaihhruai dawn tih a la chiang lova, FA Cup-a Brighton an hmachhawn hunah erawh Fletcher hian a kaihruai leh dawn tih erawh a chiang tawh. United hian Pathianni zan khian FA Cup an khel dawn a, Old Trafford-ah Brighton an mikhual dawn.
Sir Alex Ferguson hnu lama manager nei fuh hleithei lo United hian tun season chhung chu manager nghet neih an tum rih lo niin a lang. Tun season chhung an team enkawl turin manager dang rawih lailawk erawh an tum a. United midfielder hlui Michael Carrick bakah forward hlui leh an manager hlui ni bawk Ole Gunnar Solskjaer chu an manager lailawk ni tura an duh zual an ni a, tu zawk hi nge an rawih dawn tih a la chiang lo. Carrick pawh hian United hi khelh thum chhung chu a lo kaihruai zawk tawh bawk
Carrick leh Solskjaer te hi club enkawl an neih loh lai a ni ve ve. Kum liam ta June thla khan Championship club Middlesbrough in Carrick hi an ban a. Solskjaer pawhun August thla khan Turkish club Besiktas in an ban ve bawk.
United manager lailawk ni turin Carrick leh Solskjaer te hming a ri ring a. An manager nghet ni thei turin Crystal Palace manager ni mek Oliver Glasner leh Brighton manager hlui Roberto de Zerbi te hming a ri ring ve thung. Season tharah manager thar an nei ang.