Hmasawnna hna ruahman enfiah

Champhai Khankawn Police Checkgate bula soil bank siamna tur leh National Highway-06 Tuipui – Tuimuk inkara Center of Excellence: Recreational Center, cold storage leh bazar changtlung tak awm kawp theihna tur hmunhma enfiahin Inrinni khan adviser to chief minister (Technical) Er H Ginzalala hoin enfiah a ni.
Champhai district bawrhsap VL Remliana, Khawzawl district bawrhsap Vanlalthiana, sawrkar department aiawh leh khawtlang hruaitute an tel a. Champhai North bialtu MLA ni bawk Er H Ginzalala chuan ram leilung tichhe tlem zawnga hmasawnna hna kalpui a tul tih sawiin, hna tak tak thawh tan hmain soil bank mumal tak ruahman lawk a tul tih a sawi.
Khankawn Police Check-Gate bul ruam dawl zawl a nih chuan, Champhai khawpuiin kawtchhuah nuam zawk a nei anga, mipui bakah dan leh thupek kengkawhtute tan pawh awlsamna a thlen dawn tih a sawi a ni. Adviser to CM hian Champhai khawpui veta Circular Ring-Road siam a nih hunah pawh Khankawn soil bank chu tangkai taka hman theih a beisei thu a sawi bawk.
NH-06 Tuimuk-Tuipui inkar, Neihdawn ram chhunga Center of Excellence: Recreational Center, cold storage leh bazar changtlung tak din tumna hmun pawh enfiah a ni a. Neihdawn khua atanga NH-06 pawh tur link road laih a, kuthnathawktute inphochhuahna tur, khualzinte tan pawha tlawh chakfakawm tak hmunhma din tumin ruahmanna siam mek a ni tih adviser to CM hian a sawi a ni.