Hmasawnna hna thawktute atangin sawrkarin engmah lak heusak tum lo – Prof Lalnilawma

Hmasawnna hna thawktute hnen atangin sawrkarin engmah lak heu sak a tum lo a, hna tha taka an thawh erawh a beisei let thung tih minister Prof Lalnilawma chuan a sawi.
Nilaini khan Khawbung khawtlang chuan an khawchhuak – Prof Lalnilawma, Mizoram sawrkara minister a nih lawmna leh chawimawina chu an khuaah an hmang a. Khawbung khawtlangin an lawmpui leh an chawimawi chu ropui a tih thu Prof Lalnilawma hian sawiin, khawtlang hruaituten amah chawimawina buatsaih an tum thu an rawn hrilhin, mimal sum pek tur a neih loh avang leh sawrkar sum hman a duh loh avangin a hnar hmasa zet a, khawtlangin anmahni insengsoa an buatsaih sak chu a lawm takzet tih a sawi.
Hmasawnna rotling din a nih theih nan mipui thawhpuina a ngen tih minister hian sawi a. Sawrkar hmalakna enpui thin turin a chah. “Mipuiin ka department chan hnuaia hna lungawithlak loh in hmuh chuan ka hnenah thlen ula, hna thawk tha lo te kan dim dawn lo. Hmasawnna hna thawktute hnen atangin sawrkarin engmah lak heu sak a tum lo a, hna tha taka an thawh erawh a beisei let thung,” a ti.
Khawbung khawtlangin intodelhna leh hmasawnna kawngah hmabak tam tak an la nei tih a hriatpui thu sawiin, hma an sawn zel theih nan theihtawp chhuah pui a tum tih a sawi.
He hunah hian Khawbung khawtlanga pawl hrang hrangten Prof Lalnilawma hi lawmpuina thuziak leh parthi an hlan a. Minister hian khawtlang mamawh – tarpaulin, silpauline, sprayer, grass cutter leh hlo tur a hlan a ni. He hun pual hian Prof Lalnilawma farnu Dr Irene Lalrinpuii chuan August 6 atang khan a thlawna inentirna a buatsaih a ni.