NH 302 kawng laih zauh mek Inspection Team-in an enfiah

Lunglei district bawrhsap ruahmanna in Lunglei leh Tlabung inkar National Highway-302 kawngpui laih zauh hna thawh mek dinhmun leh fur ruahsur avanga lirthei tlan leh khualzinten harsatna an tawh thin sutkian a nih theih nana hma lak dan tur a hmunah Inspection Team-in an enfiah.
Inspection Team-ah hian additional DC Rochuangkimi Khenglawt bakah settlement officer Lalrinawma leh Land Revenue & Settlement department thawktute an tel a. Helai kawng zauh hna enkawltu NHIDCL hnuaia authority engineer-te leh contractor-ten lo dawngsawngin, an hna thawh dinhmun leh harsatna an neih an lo hrilh.
Fur ruahsur leh leimin avanga kawngpui chhe lai, leivung paihna hmun ruahman dan, hmun thum – Chhumkhum, Lungsen leh Tuichawnga khaw chhung helna kawng, by-pass road siam mek en hoin, NH-302 kawngpui chu mipui chakkhai leh mamawh phurhna kawngpui pawimawh a nih angin lirthei veivak leh khualzinten harsatna an tawh loh nan chak zawka hna thawh dan tur, kawng chhe zual lai thawmthat thuai theih dan turte an sawiho.
Contractor-te chuan hmun thenkhatah sub-grade an phah hnuah furin a nan avangin GSB phah hman a ni loa, fur ruahtuiin sub-grade phah sa pawh tichhiain, kawngin a chhiat zual phah tih an sawi a. Kawng chhe zual lai hi a theih ang anga an thawmthat thin thu leh NH-302 Monitoring Committee dina vil zui reng a nih thu an sawi a ni.

NH-302 kawng zauh hna thawh mek hi Hrangchalkawn atanga Tlabung thleng a ni a. Kawng hluiah chuan km 96-a thui a ni.
Tuna kawng thar ruahman ang chuan km. 75.070-a thui tur niin, package hnihah then a ni a. Package ‘A’ hi Hrangchalkawn atanga Chhumkhum thleng niin, km 37.420-a thui a ni. Package ‘B’ hi Chhumkhum atanga Tlabung thleng niin, km. 37.650-a thui a ni000.
NH-302 kawngpui zauh leh siamthat hna hi BRN Infrastructures Private Limited-in thawkin, tun dinhmunah package A-ah zaa 38.20 leh package B-ah zaa 37.65 an zo tawh.
Kawng laih leh kawng luan bakah luikawr kanna tur lei dawh tur pali (major bridge 3 leh minor bridge 1) awmin, lei dawh hna hi thawh tan mek a ni.