Mizoram State Cancer Institute (MSCI) Zemabawk-ah cancer damlo zai theihna leh cancer damlo 7 dah theihna ICU chu nimin khan health minister-in a hawng a. Hei hi Mizoram tan hmasawnna rahbi thar chhinchhiahtlak zinga ‘chhiar tel tham’ a tih theih awm e.
Mihring tam dan atanga chhuta cancer hluarna ber state kan ni a, chutih laiin keimahni state chhungah cancer damlo enkawlna damdawi in changtlung kan neih loh avangin engemaw hlekah ‘phai lam pan’ a ngai zel thin a. Sawrkarin MR Bill atan kum khatah cheng vaibelchhe 100 thuak (98.51 Cr – 2017) te a dah thin a nih kha.
Tuna MSCI hnuaia surgery services hawn thar tak hi cancer damloten an thatpuiin an tangkaipui dawn mai ni lovin, sawrkar pawhin cheng tam tak a hum theih phah dawn a. Chu mai a la ni lova, damlo chhungten sum leh pai, hun leh tha tam tak an hmanral thin kha thil dang atan an hmang tangkai thei dawn a; heng zawng zawng infawkkhawm hian hmasawnna tha zawk a keng tel dawn tihna a ni. Chuvangin, tuna MSCI hnuaia surgery service thar kan nei thei ta hi, Mizoram tan hmasawnna rahbi thar chhinchhiahtlak duhawm tak a ni kan ti lo thei lovang.
Hetih rual hian, Mizorama cancer natna a hluar em em chhan hi research felfai tak hmanga zawn chhuah a, ‘chu chu a ni’ tia chuktuah chat theih tur hi kan zawnchhuah a pawimawh hle. Mithiam ten vaihlo leh a kaihhnawih an mawhpuh pawh hi a dikna chen a awm ang, heti taka khu luai luai reng ta chu!
Chutih rualin, vaihlo leh a kaihhnawih ringawt lo pawh, mahni in chhungkhurah a ni emaw, pawn lamah a ni emaw, ei leh in kan sawngbawl dan te, eitur kan vawn dante thleng hian, mipui hriselna atana thawktu health department hian mipui zirtirna hi ngawrh taka an kalpui a pawimawh dawn hle. Natna kan ngah avanga a enkawlna institution hrawl pui pui din rup rup a ngai thin hi hmasawnna duhawm lo, ‘hmasawnna tluantling lo’ a tih theih ang a. Damlohna kaihhnawiha infrastructure lianpui pui din ngai kher lo tura tan kan lo khawh lawk thiam hi ‘hmasawnna tluantling’ emaw ‘hmasawnna rahbi thar’ emaw a ni zawk awm asin.
Hmasawnna rahbi thar…
Get real time updates directly on you device, subscribe now.