Hmasawnna thlen theitute Mizorama lut ve turin sawm

Hmasawnna thlen theitute
Mizorama lut ve turin sawm
Bharat Rural Livelihoods Foundation (BRLF) leh Axis Bank Foundation huaihawt ‘National Tribal Livelihoods Submit 2025’ chu Ningani khan New Delhi-ah neih a ni a. Mizoram Social Welfare & Tribal Affairs and Women & Child Development minister Lalrinpuii chu khualzahawm a ni.
Minister hian BRLF leh funding agency chu state 10-a hna thawk mek siin, hma an la lak lohna state Mizoram atang daiha an sawm chu lawmawm a tih thu a sawi a. Mizoram mipui eizawnna kawnga hmalak mekna, state flagship programme – Bana Kaih policy-ah thawhpui a chak tih a sawi. Kut hnathawka eizawng tam tak chu eizawnna ngelnghet zawk an neih theihnan marketing leh processing ah thawhhona kawng awm thei se a duh tih a sawi bawk.
Mizoram chu state kilkhawr ni mah se, theihna tam tak awm a ni, tiin, ruahmanna tha a awm chuan kut hnathawka eizawngtu Mizote chu hnam taima leh rinawm tak an ni a, khawkar kawngah pawh ‘Nghahloh dawr’ hun rei tawh tak atanga ching tawh an ni tih a sawi.
State dang ruala Mizoten hmasawnna kan hmuh ve theihnan tan lakpui tura sawmin, “Mizoram awmna a kilkhawr avang leh population a la tlem avangin CSR fund bakah funding agency lian lo lut an la tlem a, international border neih kan nih avangin state dang aiin harsatna tam tak hmachhawn a tul. Mizoram hmasawnna tur atana thawhhopui atan inhawng takin he Summit-a kalkhawmte hi ka sawm a ni,” Lalrinpuii hian a ti.
Tribal Livelihood Summit-ah hian funding agency lian ho, PSU bakah international development sector-a thawkte leh central ministry leh state hrang hrang aiawh an tel a. Kum 2013 khan sawrkar laipui chuan BRLF hi autonomous society ni a, tribal-ten eizawnna ngelnghet an neihna atana thawk tura a din niin, tunah hian tribal hnam awmna state 10-ah state sawrkar nen tangdunin hna an thawk mek. Central fund bakah CSR fund hmangin foundation lian tak tak nen an thawkhoa, Mizoramah pawh lo lut ve turin sawrkarin ruahmanna a siam mek a ni.