Hmeichhe final: Swiatek vs Muchova

Hmeichhe final: Swiatek vs Muchova
French Open hmeichhe singles hmawrbawk zan kan thleng dawn a, champion lai Iga Swiatek leh unseeded Karolina Muchova chuan zanin hian cham-pion nih an inchuh dawn.
Ningani khan Polish world number one Swiatek chuan semi-final match pakhat zawkah 6-2, 7-6(7)-a Brazilian Beatriz Haddad Maia hnehin kum li chhunga a vawithumna atan Roland Garros-ah final a lut.
Top seed Swiatek hian nikum leh kum 2020 khan Suzanne Lenglen Cup chawiin, a vawi-thumna atana Paris champion nih leh tumin last four match-ah mak taka rawn chetha chho 14th seed Maia a hmachhawn a; nikum Toronto khawpuiah khan Bra-zilian nen hian a vawikhatna’n intawngin, Pole hi tlawm zawkah a tang a, kha vang khan ‘pressure’ sang fu nei chungin Ningani zanah khelmual a lut a, grand slam-a tawnhriat nei zawk a nihna chhawrin hnehtu zawkah a tang.
Swiatek hi he hmuna mipa title tum 14 la thei awmchhun Rafael Nadal-a fan ruhkawl inti ve ngat kha a ni a, mahse, Paris khaw leisenah hian Spaniard ang em ema rei ro a rel zawh ve a rin loh thu semi-final a paltlang zawha news conference a hma-chhawn tumin a sawi!
Ningani zan semi-final leh-lamah champion se world number one thar ni thei tur Aryna Sabalenka chu Czech nula Karolina Muchova lakah 7-6(5), 6-7(5), 7-5-in a tlawm a, ti hian, kum 26 mi hi Jelena Ostapenko (2017) leh Swiatek (2020) dawta top 40 luah pha lo chunga Roland Garros final thleng thei pathumna niin, Ostapenko leh Swiatek-te ang khan world number 40 pawn lam atanga final a luh vawikhatnaah champion ve thei tak ang maw?
Mixed doubles title
He title latu pakhat zawk Japanese player Miyu Kato hi tunkar tir lam women’s doubles competition third round-a Czech Marie Bouzkova leh Spaniard Sara Sorribes Tormo inkawp an hmachhawn laiin chair umpire Alexandre Juge chuan a kawppui Indonesian Aldila Sutjiadi nen khel zawm thei loin a hnawtchhuak (disqualified) a, mittui nena khelmual an chhuahsan hnuah Ningani zan khan Kato hian mixed doubles final khel turin court a lut leh a, German Tim Puetz nen title an sualchhuak ta a ni.
Court Philippe Chatrier-ah Kato leh Puetz tangdun hian 4-6 6-4 (10-6)-in an khingpui Canada nula Bianca Andreescu leh New Zealander Michael Venus an hneh a; mixed doubles title an lak hnuah Japanese chuan women’s doubles lama hnawhchhuah an nih avang khan a point leh prize money hmuh tur a chan dawn a, mahse, a khinlet hlawhtlin ngei a rin thu leh a hun tawn khan rilru lamah chona lian zawk a siamsak tih a sawi a, hun khirh a tawh laia amah thlawptute chungah lawmthu a sawi nghal.
Kato hian engtik niah emaw women’s doubles title chu an la sualchhuah tho tho a beisei thu leh hnawhchhuah an nih laia an hmachhawn Sara leh Marie tangdun kha a chipui Aldila nen bawk an la bitum leh ngei a beisei tlat thu a tarlang tel.