Hmeichhe footballer man to ber thar Lizbeth Ovalle

Hmeichhe footballer man to ber thar
Lizbeth Ovalle
United States women’s professional soccer league chu a hmingah National Women’s Soccer League (NWSL) an ti a, chu league team 14 zinga pakhat Orlando Pride an tih chuan tunhnai khan pound maktaduai 1.1 (USD 1.5m)-in Lizbeth Ovalle an lei a, he transfer fee hi women’s football history-a player leina man sang ber (record fee) thar a ni.
Hmeichhe footballer ropui Marta leh Barbra Banda tihte nena khel tlang tur Mexico winger Ovalle hi Orlando chuan Mexican club Tigres UANL atangin an senglut a, thla hmasa maia Champions League holders Arsenal-in Liverpool atanga Canada forward Olivia Smith an leina man £1m kha khumin record thar a rawn ni chho ta a ni.
Kum 25 mi Ovalle hian NWSL champion Orlando Pride-ah kum hnih daih contract ziakin, a khelh that a, club lam an lungawi a nih chuan kum khat dang a cham chhunzawm thei ang.