Hmeichhe naupang kum 8 miin gymnastic record siam

Hmeichhe naupang kum 8 miin gymnastic record siam
American hmeichhe naupang, Kynlee Heiman, kum 8, chuan gymnastic record siamin, second 30 chhungin gymnastic bar toe-to-hand vawi 18 a vir chhuah pui hman a, hmeichhe gymnast zinga record thar a ni.
Gymnastic bar toe-to-hand rotation chu, bar-ah an uai a, an kephahin bar rap tel chungin an vir thin a, hetiang hian second 30 chhungin vawi 18 a vir kual hman a ni.
Kynlee chuan, “A nuam ka ti, ka vir (flip) apiang kha nuam ka ti vek, thlawk ang mai niin ka inhria. Gymnastic hi ka ngaina tawp a ni mai,” a ti.
Guinness World Record siam thei khawpa theihna nei tawh a ni nain, gymnastic hi kum li kalta atanga a tuipui ve tan chauh kha a la ni a, a la naupang bawk a, Olympic games pawh a la en ve hman lo!
A thawkrim hle a, zing dar 5:30-ah thoin, an chenna atanga darkar hnih tlan vela awm gym-ah a chhungten an kalpui vang vang a, tah chuan a inzir thin. A chhungte chuan Guinness World Records bu an enna atangin record siam ve chakna a nei ta niin an sawi.