Hmeichhe pawngsual rawn leh a hmaia acid leihtu mi pahnih kum 42 tang dawn

Border Security Force mi, Mizoram chhung Silsuri West-a post an nih laia hmeichhe pakhat pawngsual rawn hnua a hmaa acid leih zuia puhte chu Additional District & Sessions judge-I Sylvie Z Ralte chuan thiam loh a chantir hnu ah kum 42 ve ve lung in tang turin a hrem.
Heng mi pahnih – Nilanjan Das leh Dinesh Kumar te chungchangah June 12 khan court hian thutlukna siamin thiam loh a lo chantir tawh a, June 16 khan hremna hi a tichhuak leh a ni.
Thudawn danin, India ram hmun danga hriat tur awm fo, acid hmanga mi hmai-hmel /taksa tihchhiat tuma inbeih chungchang case hi court-in Mizorama a ngaihtuah vawikhatna a nih bakah hremna pek hmasak ber nia sawi a ni a. Tun tuma pawikhawihtute hi thubuai pali pekah an chungthu ngaihtuah a ni a, thubuai pathumah thiamloh chantir an ni.
Pawngsual rawn thubuai bikah pahnih awmin, pakhat hi kum 20 chhung hrehawm taka lung in tang tur leh sumfai Rs. 20000 chawi tura tihna ni a; sumfai hi a pek theih loh chuan thla hnih dang lung in tan belha tlak tur a ni a. Pakhat dang hi kum 10 chhung hrehawm taka lung in tang tur leh sumfai Rs. 20000 chawi tura tihna ni a; sumfai hi a pek theih loh chuan thla hnih dang lung in tan belha a tlak tur a ni.
Thubuai pakhat dang hi acid hmanga mi beihna a ni a. Pakhatah hian kum 12 tang tur leh sumfai Rs. 20000 chawi tura tih a ni a, a chunglam ami ang bawkin a umfai hi a pek theih loh chuan thla hnih dang lung in tan belha a tlak tur a ni.
Heng thubuai pathuma thiam loh an channa hi belhkhawmin, an tan hun tur hi kum 42 a ni dawn ta a ni.
He thil thleng hi 2017 July 16 a ni a. Pawngsual tawktu leh a unaupa te sawi dan atangin BSF mi pahnih hi man an ni. Pawngsual tawktu thiannu pawh a hemi lai hian a bo nia sawi a ni a, a ruang hi 2017 July 27-ah hmuh a ni a, hemi kaihhnawihah hi chuan court-ah finfiahna tha tawk pek a harsat tawh avangin thiam loh chantir theih an ni ta lo thung tih sawi a ni.