Hmeichhe tana hriat nuam

Hmeichhe tana hriat nuam
Hmeichhe rilru hre thei ila, tih hi mipa te thil chak ber pakhat a ni ang. Chutiangin, eng nge an hriat chak zawng leh ngaihthlak nuam an tih zawng te hre thei ila, mipa tan kawng a awlsam sawt ang.
Eng nge a hriat chak zawng leh ngaihthlak nuam a tih zawng i hre duh em? Hmeichhia chu tihlawm an har, han fak ila chintawk an nei lo, an duh belh zel, kan ti pawh a ni mai thei. Mahse, engmah thil harsa a awm lo, a hriat tawh hnu kha hrilh nawn fo la a ni mai. Khai le, relationship lama mithiam ten hmeichhiain a hriat chak zawng leh a lawm zawng ni a an sawi te kan rawn tarlang e.
1. I van nalh em em! Hmeichhiain thil ngainat pathum an nei an ti- eitur tuihnai, thawmhnaw leh fakna awka. Chuvangin insum duh suh, fak mawlh mawlh mai rawh, tichuan nang pawn a fakna i dawng hnem ve a ni mai. A kawr thar te a inhmeh thu sawi la, a sam tihdan leh a pian thlengin nalh i tih chu hrilh rawh.
Clinical psychologist Dr. Sushma Dayal chuan, “Tu pawhin fakna aw ka dawn nuam kan ti a, min ti-confi-tu a ni a, kan personality chawi sang theitu a ni,” a ti.
2. Nang ang hi ka la tawng ngai lo! He thu hi hrilh teh a lawm ru veng veng ang. “Ka duh leh hmangaih hmasa ber i ni,” te pawh han ti teh. Chu chuan a ti-confi sawt dawn a, a ring sawt bawk ang che. Hetianga i tih chuan special bik riaua inhriatna a nei ang.
Psycholohist Archana Nanda chuan, “Hmeichhe hnenah ani chu i hmangaih hmasak ber a ni tih i hrilh chuan, chu chuan a ti-confi ang a, a tan i rinawm dawn rinna a neih tir thei bawk. Mahse, hei hi hmeichhe tihlawm tum vang mai a sawi chi a ni lo, i rilru tak tak a nih chauhin sawi ang che,” a ti.
3. I van zei! Hmeichhia ten mipain zei an tih hian nuam an ti, hetianga i tih chuan in inkawm fal leh hunah a zei telh telh ang. Zei lo nih hlauin a theihtawp a chhuah ve a, chu chu lo hriat sak la, ngawihbopui mai lovin sawi chhuak ang che.
Relationship expert Sunil Garg chuan, “Hmeichhia chu a zei tih i hrilh chuan a tihlawm che a tum nasa telh telh ang. A lawmna i siam khan nang pawhin lawmman i dawng ngei dawn a ni,” a ti.
4. Fate enkawl i thiam ngawtin ka ring, tiin han fak chhin teh. Hmeichhia ten fa enkawl lamah eng nge a an ang tih hi an inngaihtuah fo a, chutih laia nu tha leh fate enkawl thiam tak ni tura i rin thu a hrilh khan a ti lawm ngawt ang. Naupang enkawl thiam nih hlawh hi hmeichhia te inchhuan ve na pakhat a ni a, chuvangin hetiang kawnga fakna aw ka hi an tan ngaihthlak a nuam hle a ni.
Clinical psychologist Dr. Sushma Dayal chuan, “Hmeichhia chu fate enkawlna kawngah nu tha tak a ni thei dawn tih i hrilh chuan a lawmzawng tak a ni ang. Hmeichhia zawng zawng deuhthawin an fa neih hun tur an thlir lawk a, naupang enkawlna kawngah eng nge an an ang tih an ngaihtuah lawk fo thin a ni,” a ti.
5. Dam chhung hun hmanpui atan ka duh che a ni, han ti teh le. Chu chu a thinlungah rimawi mawi tak a ni chiang ang. I chhaih kual vel mai mai lo va, i rilru tak tak i pe tih i lantir a ni. A tel lo chuan i nun a kim dawn lo tih te pawh han hrilh teh le. Nilengin a hlim viau a nih pawhin mak ti suh!
Psychologist Archana Nanda chuan, “Hei hi i rilru tak tak a nih loh chuan sawi mai mai chi a ni lo. Thu pawimawh tak a ni a, chuvangin i sawi hmain i ti tak tak em tih nangmah chiang hmasa ang che,” a ti.
6. Eng nge i ngaih dan? tiin a ngaihdan han zawt ve fo teh. I thawmhnaw lei tur emaw, in chhung bungrua emaw, car thar emaw bike thar emaw i lei dawn a nih pawh a ngahdan han la ve chhin teh. Hetianga i tih hian ani chu i ngai pawimawh a, a ngaihdan te i tan a pawimawh tih i lantir a chu chu hmeichhe tan a lawmawm hle a ni. Hmeichhia ten an ngaihdan leh thil hmuhdan sawi chhuah ve te hi nuam an ti hle a ni.
Clinical psychologist Dr. Sushma Dayal chuan, “Hmeichhiain thutlukna siamna kawngah pawimawhna a nei tih inhriat ve hian nuam a ti thin a, thil lian tham emaw tê deuh emaw pawh ni se a tel ve khan nuam a ti thin a, zahawm leh special riaua inhriatna a nei thin,” a ti.
7. Ka hmangaih leh ka thiantha ber i ni, tiin han hrilh teh. I hmangaih ber khan i thiantha ber nih pawh a duh a nia. I thian anga i en theih nih kha atan a hlu a, amah i ringtawk tih i lantirna a ni nghal. Inkawmngeih a thil engkim tidun thei nih kha inhmangaihna suih nghettu a ni.
Marriage counsellor Manmeet Bhalla chuan, “Hmeichhe hneh tur chuan a thian tha nih hmasak a pawimawh. I bialnu a nih ringawt piah lamah i tan a pawimawh tih a inhriat theihna kha a pawimawh. I harsatna leh buaina-ah te i mamawh tih a inhriatin a tan a nuam a ni,”a ti.
8. Nang ka tawng che hi ka vannei ngawt mai! Ani chu tawng lo la chuan i la ‘single’ renga i inrin thu te han hrilh teh. Ani i tawn avanga vannei i intihzia te, i nun tikimtu a nih dan te, amah avanga khawvela hi mawi i tih tak riau dan te han hrilh la. Lawm avanga a sen deuh ap ap a nih pawhin mak ti suh.
Marriage counsellor Manmeet Bhalla chuan, “Hei hian i nuna tel ve turin i pawm tih a lantir a, amah avanga hlimna leh lawmna i tawn te khan a chhungril a ti lawm veng veng ang. I mamawh tih a inhriatna tluka tluka atana hlu a awm chuang lo,” a ti.
9. Ka ngaihtuahna te pawh i hre thei a nih hi, han ti chhin teh. Hmeichhiain a kawppui/ngaihzawng hrechiang em em, a duh leh duh zawng te pawh hrethei nih hi nuam an ti. Present tur i duh zawng tak lei fuh chat thei nih kha a inchhuanna tur a ni ve tlat. I chawhmeh duh zawng tak, tui i tih ang taka siam thei nih kha atan a nuam tlat.
Clinical psychologist Dr. Sushma Dayal chuan, “Hmeichhia ten an kawppui te hrechiang nih an duh thin a, chu chu i nemnghah sak theih a, nangmah ai maha hrechiang zawk che anga a inngaih theihna tura i awm khan in inkar a pawt nghet sauh ang,” a ti.
10. Ka hmangaih che tih hi i sawi theihnghilh hauh loh tur a ni. I chetziain i lantir fo a nih pawhin tawngka ngeia sawi bansan chuang suh. Hmeichhia ten he thu hi an ngaipawimawh em em a nia. A hun bik a awm chuang lo va, a rin loh deuh lai te khan han hrilh thut teh. Engati teh thut nge maw ni le? a tih rilruk a a ngaihtuah chhunzawm veng veng turte khan han sawi chhin teh. ‘Ka hmangaih che’ tih hi sawi fo tur a ni a, mahse, a over chin erawh a awm tih hriat a tha.
Marriage counsellor Manmeet Bhalla chuan, “Hmeichhe tan mipa kâ atangin he tawngkam aia ngaihthlak tur duhawm a awm chuang lo. I sawi ngun tawh viau a nih pawhin sawi zel rawh. Hei hi kan inkara hmangaihna hrui tih feina pawimawh tak a ni. I sawi ngun zawh poh leh a tha ting a ni mai,” a ti.