Hmeichhe zaithiam zinga recording hralh hnem ber Madonna

Music sales-ah chuan hmeichhe zaithiam zingah tuman Madonna an la tluk thei lo. Tuna Celebration Tour nei mek Madonna chu Guinness World Record-in khawvela hmeichhe zaithiam inhralh tha berah an puang.
Madonna, kum 65, hian The Tonight Show-a Jimmy Fallon-a’n a kawmnaah pawh music sales maktaduai 400 chuang a neih tawh thu a sawi a, hetah hian a album hrang hrang, singles leh digital a tel vek a ni.
An hralh zat chiah chiah hi chu hriat a har tawh a, mahse, hetiang aia tam inhralh thei chu The Beatles, Elvis Presley leh Michael Jackson te chiah an la awm a, Madonna hi palina a nih rualin, hmeichhe lamah chuan pakhatna a ni ve thung. Queen of Pop tih pawh hi a inhmeh viau e. Madonna hi hmeichhe lamah hian Rihanna, Mariah Carey, Taylor Swift leh Beyonce ten an dawt a ni.
Tour atanga sum lak luh tamah pawh Madonna hi hmeichhe lamah tluk pha an la awm lo va, tuna a tour neih mek tel lo hian, nikum July thlenga tour atanga a sum hmuh tawh hi dollar 1,38,97,46,222 a tling tawh a, heti chung hian The Rolling Stones, U2, Elton John leh Bruce Springsteen te a la pha lo. Mahse, tuna a tour hi a zawh leh huna a sum lak luh hi a maktaduai telin a la pung leh dawn a ni.