Hming thlak ….

Agriculture Minister chuan kut hna thawktute hamthatna chu sawrkarin a ngaih pawimawh ber pakhat a nih dawn avangin Agriculture Department hming pawh Agriculture & Farmers’ Welfare Department tia thlak tuma hma lak mek a nih thu a sawi a.
Sawrkar hmasa khan sawrkarna an chelh hnu lawkah hming thlak kha an buaipui a, MIMER pawh ZMC tiin thlak a ni a, Capital Complex pawh Mineco tia thlak a ni bawk a. Tuna sawrkar thar pawh hian hmingthlak hi a rawn tuipui ve leh viau dawn nge ni?
Agriculture department hi farmer-te hamthatna tura din a ni a, Assam atanga kan indan tan tirh, UT kan han nih phat atanga department neih hmasak kha a ni. Department hmingah hian loneitute hamthatna (farmers’ welfare) tih tel kher lo mah se, he department-in a bitum ber chu loneitute (farmer) hamthatna a ni tih a chiang nghal mai.
Tuna agriculture changtu minister-in agriculture department hming thlak an tum chhan- “kut hna thawktute hamthatna chu sawrkarin a ngaih pawimawh ber pakhat a nih dawn avangin…” tih hi, ‘tunhmaa sawrkarna lo chelh tawhte khan loneitute hamthatna an lo ngai pawimawh tawk lo em ni,’ tih zawhna a siam thei awm e.
Sawrkar thar hian kuthnathawktute a ngai pawimawh ber a nih chuan, department hming thlak kher lo pawhin hna a thawk thei tho lo em ni? tih zawhna a piang thei ang a. ‘Hming han thlak hian, chona a siam thar a, chu chuan phurna a siam..’ tih ngaihdan te pawh a awm thei bawk awm e. Hming thlak hi a hma aia tha zawka thawh theihna a nih dawn phawt chuan, department hming hi thlak sup sup mai ila a tha mai lo maw? tih ngaihdan a lo piang thei bawk a. Eng pawh ni se, Mizoram innghahna lian ber chu agriculture a nih avangin he department hi chu a pawimawh a, budget-ah pawh topper ni mah se, a inhmeh hliah hliah dawn a. Kuthnathawktute dinhmun a that chuan ram economy pawh a tha dawn a, GSDP-a contribution sang tak nei ve thei tura kuthnathawktute dawmkan hi a pawimawh reng a ni.