Hmun hrang hrangah Remna Ni

June 30 – Remna Ni chu Mizoram hmun hrang hrangah, district headquarters leh khaw thenkhatah hman a ni a. Zingkarah ‘Remna kawng zawh – Peace Walk’ neih niin, sawrkar department hrang hrang, khawtlang hruaitu, tlawmngai pawl, leh zirlaite an tel a ni.
Aizawlah chuan Tourism department buatsaihin zingah ‘Peace Walk’ neih a ni a. Minister Lalruatkima’n hmanpuiin, Chanmari leh Sikulpuikawn atanga bultanin, Vanapa Hall kawtah an intawkkhawm a ni.
Mamitah chuan zingkarah district bawrhsap VL Remliana hoin Remna Ni lawmna kawng zawh a ni a. Chhun lamah Assembly speaker Lalrinliana Sailo hoa hun hman leh a ni.
Lawngtlaiah chuan Assembly deputy speaker H Biakzaua chuan zingkarah Peace Walk a vailiam a, chhunah ama ho bawk hian Remna Ni pual inkhawm hman a ni.
Hnahthialah chuan minister Dr R Lalthangliana hoa hman a ni a. Siaha ah chuan zingah district bawrhsap Lalhmunsanga Hnamte hoin Peace Walk neih a ni a, chhunah MADC CEM M Laikaw hoin a lawmna hman zui a ni.
Saitualah chuan minister Lalchhandama Ralte hoin hman a ni a; Champhaiah chuan zingah district bawrhsap James Lalrinchhana hoa kawng zawh niin, chhunah minister TJ Lalnuntluanga hoa hun hman a ni.
Lungleiah chuan zingah district bawrhsap Ramdinliani hoa kawng zawh niin, chhunah HPC vice chairman Lawmawma Tochhawng hoin Remna Ni hi lawm a ni.
Serchhipah chuan zingah addl DC James Lalnithanga hoin kawng zawh a ni a, chhunah minister Er Lalrinawma hoin hun an hmang. Kolasibah pawh zingkarah Peace Walk neiin, chhunah minister K Lalrinliana hoin hun hman a ni.
Remna Ni lawmna pual hian district tinah painting, photography, essay, quiz leh thildangahte zirlai leh mipui nawlpui tan intihsiak buatsaih a nih bakah thingphun, health camp leh thisen pek te huaihawt a ni bawk.