Hmun pawimawh ho tlawh chakawm tura insawisiakah Serchhip titha ber

Tourism department bultum Mizoram-a district hrang hrangten an huamchhunga hmun tlawh chakawm tura an insawi nawm siakna chu a hmawr bawk a ni a. Serchhip district aiawhte chu pakhatna an ni.
Kumin June khan district hrang hrangah thawnthu sawi hmanga inelna ‘Narrating Mizoram: A Tales of Our Land – Storytelling Competition’ neih a lo ni tawh a. Heta district tina a titha zualte hi August 8 zan khan Aizawlah an inel leh a, district thenkhat hi mi pakhat chauhin ai an rawn awh laiin mi pahnih inlanna district an awm bawk a, mi 15 an inlan.
Aizawl district atangin Grace Lalrinpari leh PC Lalruatdika; Lunglei district atangin Zorinmawii Ralte; Siaha district atangin Zine P Fachhai; Champhai district atangin K Lalvenpuii leh Vanlallawmkima Gangte; Kolasib district atangin Josia Lalruatfela; Serchhip district atangin Lalruattluanga leh Lalthanzami Chhangte; Mamit district atangin Rodinsanga; Hnahthial district atangin Dr K Lalzuimawia; Saitual district atangin Deborah Lalnghakmawii leh Esther Lalmalsawmi; Khawzawl district atangin H Lalngurliana leh R Lalhlimmawii an ni.
1-na chu Serchhip district niin lawmpuina thuziak leh sumfai Rs. 50000 an dawng a, 2-na Saitual district-in Rs. 30000, 3-na Khawzawl district-in Rs. 20000 an dawng.
Inel hmawrbawkna hmanpuitu Tourism minister Lalnghinglova Hmar chuan zinmite hipna atan leh kan ram hmun pawimawh leh nuam tak takte chanchin vawnnunna atana Mizoram district hrang hranga hmun pawimawh behchhana thawnthu sawi hmanga inelna buatsaih a ni chu lawmawm a tih thu a sawi a. Kan ram, kan hnam leh kan hmunhma chanchin ngaihnawn taka midang hnena kan sawi thiam chuan a ngaithlatute thinlungah a taka hmuh ve chakna a tuh a, chu chu kan rama tourism tih hmasawnna kawngah thil pawimawh tak a ni tih a sawi.
Tourism director R Lalrodingi chuan zinmite leh a chhunga chengte ngei pawhin kan state chhunga hmun nuam tak tak kan hmelhriatnan leh tlawhchhuah a nih theihnana phochhuah tlakte phhochhuak tura district level atangin inelna hi buatsaih a ni tih a sawi a. He hmalakna hlawhtlin chhan pawimawh ber chu he inelnaa tel te vang a ni tih a sawi.