Hmunphiah hmun neitute phur lo, mahse an lawm

Hmunphiah keh hun lai a ni a, mahse Vairengte leh a chhehvela hmunphiah chu kum dang angin an la kek lo. Kek chu an awm a, mahse kum dang ang chu a ni lo tih thu dawn a ni.Vairengte velah hian January thla laihawl atangin hmunphiah an kek thin a, February thla laihawl thlengin a vanglai a ni thin. Thu dawn danin, kuminah erawh an la kek nasa lo a, a hralh chu an hralh tawh, mahse a man (rate) hi an beisei ang a ni lo. A sang zel ang tih an beisei a, a man hi an beisei ang ni rih lo mah se nikum leh nikum hmasaah an lo hlawhchham tawh avangin a theih ang anga hralh hi an duh.
“Tun ang hun te chu a vanglai a ni tawh a, kuminah kek kan awm tawh a, mahse kum dang ang chu a la ni lo. A vanglai a la thleng lo pawh a ni thei a,” hmunphiah hmun neitu pakhat chuan a ti.
“Hmunphiah hmun hi tin sarih hmun ka nei a, mahse ka la kek lo. Keimah ang hi ka hre teuh,” a ti bawk.
An sawi danin, 2024 leh 2025-ah hmunphiah man (rate) a chhia a, kum hnih an chet chhiat tawh avangin kuminah an phur lo. Hmunphiah hmun neiah pawh a hma anga enkawl tha lo an awm. December hnuah ruah tui a that loh avangin an hmunphiah hi kum dang ang a ni lo ang tih an hlau bawk. Kum dang angin kumin chu an phur lo tih an sawi.
2024 leh 2025-ah sorkarin hmunphiah man a bituk a, a ro kg-ah Rs 100 a ti. Kha kha hmunphiah man tihniamtuah an ngai a, Rs 100 pawh hniam an tih tawh laiin kuminah a ro kg-ah Rs 80-a lei tur tia sorkarin a bituk leh avangin a phurawm loh tih an sawi.
Hmunphiah ro hi a hma chuan kg-ah Rs 100 aiin a to a, sorkarin Rs 100 a tih khan a lei thintute’n chumi tinzawn chuan a man an bithliah a, an hmunphiah man a tlahniam tih an sawi. Chuvangin a ro kg-ah Rs 80-a lei tur a nih phei chuan a tlawm lehzual ang tih an hlauh thu an sawi a ni.
Tunlai hian Aitlangah a hring kg-ah Rs 35-in an hralh a, kawngpui dungah Rs 30-in an hralh. Kum dangah chuan Rs 40 te’n an tan a, chu chu a leitute’n inlanin a to telh telh thin. Kumina an tanna hi hniam an ti a, mahse a sang telh telh ang tih an beisei.
Hmunphiah hi tun hma atangin a hringin an hralh thin a, a hring kg thumah a ro kg khat a chhuakah an ngai. Chuvangin a ro kg-a Rs 100 leh Rs 80 hi hniam an ti a ni.