Hmunphiah inleisakna man ba cheng nuai 54 pek phutsak

Marpara leh a chhehvel khuaten sawrkarin ti tura a tih anga society kaltlanga King Industry-in hmunphiah a leisak man chu cheng nuai 54 a la batsak tih MPCC hruaitu Zodintluanga chuan sawiin, pe thuai turin a phut tih a sawi.
Lok Sabha inthlanpui atana MPCC star campaigner Zodintluanga hian Marpara-a an party mite nen an inkawmnaah Thorang bial chhunga Marpara khaw chhehvel khuaten ZPM sawrkar ruahman anga society din tir a, King Industry (Falkland Aizawl) hnenah hmunphiah an hralhtirna man, cheng nuai 54 chuang an la ba tih sawiin, kuthnathawktu hmakhaw ngai tak anga lan tum a, mipui bumna leh tih beidawnna lian tak, kalphung thar sawrkara hmuh tur a awm ta fo chu a pawi a tih thu a sawi.
MPCC hruaitu sawi danin, ZPM sawrkar duh dan angin hmunphiah chingtute hi society din tir an ni a. Kuthnathawktute hian an rintawk avangin society-ah Rs.100 chawiin an inziaklut a. King Industry hnuaiah hian Marpara chhehvel khua atangin mimal leh chhungkua bakah a hlawma pete nen mi 269-in hmunphiah hi an pe a ni.
Mi 269 vel hnen atanga hmunphiah a leina man hi King Industry hian nuai 20 chauh a la pe a, nuai 54 chuang a la bat sak tih a sawi. King Industry hian hmunphiah ro hi kg khat Rs. 75 chauha a lei theih laiin, kum 2023 khan kuthnathawktute hian kg khat Rs. 120 in an hralh thei thung tih an lo sawi a ni.
Kumin hian kuthnathawktu hnenah King Industry hian kg khat Rs. 100 a lei tura an insawi laiin, Rs. 75-in an lei sak thei hram tih kuthnathawktute hian Zodintluanga hi an lo hrilh a ni.