Hmunphiah man a tha, hralh turin daih lo zawk

Kum hnih an buai hnuah kuminah Vairengte leh a chhehvelah hmunphiah man (rate) a tha pangngai a, man takin a thartute’n an hralh leh thei ta.
Nikum leh kum hmasaah hmunphiah man a hniam em avangin an lo buai tawh a, chuvangin hmunphiah hmunte pawh a hma angin an enkawl phur lo. Kuminah pawh hralh tur an ngah lo sawt a, a lei duhte’n an duh ang zat an hmu lo titih tih thu dawn a ni.
Vairengte leh a chhehvel khuate hian tunlaiin hmunphiah hi a hring kg-ah Rs 48 velin an hralh a, Rs 50 kai tum te pawh a awm. A hring chutiang zata hralh chu a thartute tan a hlawk pha a, nikum leh kum hmasa angin an buai lo tih an sawi.
Kuminah pawh hian ngaihngam zan lovin an awm a, an hlauh ang ngeiin a tirah a man a hniam; a hnuah a sang ta a, chuvangin a vanglai pawh an thleng tlai ta deuh.
An sawi danin, January thla laihawlah hmunphiah hi an kek tan thin a, February thla laihawl thlengin a vanglai a ni thin. Kuminah January thla tawp lamah pawh hmunphiah hi a hring kg-ah Rs 35 te a la ni a, kawngpui dungah phei chuan Rs 30 te a ni. Chutiang zata hralh chu an phur lo a, vanneihthlak takin a man a pung ta a ni. A hring hi kg-ah Rs 40 a tlinin hah man a awmah an ngai.
A man a that tak avangin February thla chawhma lamah an kek tak tak ta chauh a, Rs 45 chung lam niin, Rs 50 a tlin lai te pawh a awm.
“Kum hnih kan buai avang khan kan phur lo a, a hmun neite pawhin kum khatah vawi khat chauh te kan sam a, vawi thum tal sam kan duh thin kha a ni a. Kan phur lo a, a hma angin kan thar tam lo. Mahse hmunphiah rate chhiat hma angin thil a kal leh hi kan lawm a, Bagha, Lailapur leh Hawaithang vel te a thleng thla a, kan lawm khawp mai,” hmunphiah thartu pakhat chuan a ti a, “A hma angin kan thar tam lo zawk a. Kan phur lovina kan tih tak tak lo deuh kha chu thuhran ni se, December hnuah ruah tui a mumal loh avangin hmunphiah hi a tha lo deuh bawk a. Chuvangin a leitute hian an duh ang zat an hmu lo,” a ti bawk.
Sorkarin a ro kg-ah Rs 80 a ti a, hmunphiah thartute chuan sorkar hnenah a ro hetiang zata hralh hi an duh loh thu an sawi a, a hring kg 3-ah a ro kg 1 a chhuak a, chuvangin a hring Rs 40 chung lama hralh hi an duh zawk thu an sawi.