Hna hmasa ber chu Lalpa tan

Kum a thar a, khawvel ram dangte ang bawkin Zoramah pawh mipuiin hna an tan leh tawh. Khawhai khuaah pawh hna an thawk leh tawh a, an hna hmasa ber chu Lalpa tan an ti.
January ni 3, Inrinni khan 2026 atan hna an thawk tan a, kum dang ang bawkin kuminah pawh hna hmasa ber chu Lalpa tan tiin, kohhran tan an thawk a ni.
An hmasa ber hi thingphurh a ni a, mipuiin hnatlangin thing an phur. Chu chu an hralh ang a, a man chu kohhran ta tur a ni.
“Kum tina kan tih dan a ni a, tih turah kan ngai nghet tawh a, mipui hian hna hmasa ber chu Lalpa tan tih hi kan than hnan tawh ti ila a dik ber ang,” tiin Khawhai Presbyterian Kohhran hruaitute zinga mi Upa PC Lalremruata chuan a sawi.
“Kan hnathawh hmasak ber chu Lalpa tana pek kan duh a, chu chu kan rilru chu a ni a. Kohhran Committee-in hna tur leh a hmanna tur a rel a, chutiang chuan kan thawk mai thin,” a ti bawk.
An hruaitu dang Upa PC Lianthanga pawhin, “Kum thara hnathawh ni hmasa berah hian mahni tana thawk lovin Lalpa tan i thawk ang u tih hi a awmzia chu a ni a, kum thara kan hna hmasa ber hi Pathian tana thawh kan duh a ni,” tiin hemi chungchang hi a sawi.
Khawhaiah hian Khawhai Presbyterian Kohhran bakah hian Khawhai North Presbyterian Kohhran te, Khawhai South Presbyterian Kohhran leh Khawhai Venglai Presbyterian Kohhran te an awm a, anni pawhin kum thara hna hmasa chu kum tinin Lalpa tan an thawk thin. Kuminah pawh thing phur leh biak in hung chhung tifaiin kohhran dang pathumte hi an hnatlang a ni. Kohhran pawl dang pawh an awm a, anni pawhin kum a lo thar hian hna hmasa ber chu Lalpa tan an ti thin.
Kohhran hlun ber Khawhai Presbyterian Kohhran hi a bultantu an ni a, an tan kum tak hi hriat a ni lo. 1980 hma lamah pawh an ti tawh a, kohhran dang pawhin tih turah an ngai ta zel a ni.
Kohhran hlun bera lawite hi member 178 vel an ni a, Inrinni-a thingphura hnatlangte hi mi 120 an ni. Naupangte pawh an tel a, chhungkuaa thawk chhuakte pawh an awm.
Hemi nia hnatlangte thing keuhkhawm hi thingkhawm ft 6-a sang, ft 24-a seiah an dahkhawm a, thing hring niin, ai khat Rs 4500 zel an chhiar. Ai khat hi ft 6 bial vel a ni.
An thing hralhna man tur hi Kohhran Sunday School Hall sakna senso atan an hmang ang; Sunday School Hall hi kum li vel an sa tawh a, tun hnai kum thar an hna hmasa ber hi Sunday School Hall sakna tur a ni deuh zel.
Ramthar puala thawh chang a awm a, tualchhung kohhran puala thawh chang te, rethei tanpui nana an tih chang te pawh a awm.
Thu dawn danin, Khawzawl District-a Khawhai mipuiin hna hmasa ber hi Lalpa tana hlan turah an ngai nghet tawh a, khawtlangah chhiattawk leh vanduaina tawk an awm te a nih loh chuan, harsatna a awm a nih loh chuan hetiang hian kum tin an ti thin. Covid-19 len lai khan kum hnih an ti thei lo bawk. Hna hmasa ber Lalpa tan tia an hnatlan loh kum chuan nuam an ti lo thin.