Hnahthiala sawhthing lei khawl kg.ah Rs.20-in lachhawng dawn

Hnahthiala sawhthing lei khawl
kg.ah Rs.20-in lachhawng dawn
Hnahthial district-ah sawhthing quintal 1139.58 leikhawm a ni tawh a, kg ah Rs. 50-a an leisak hi a lachhawng tur an hmu tawh a, kg ah Rs.20 in an la dawn.
District Agricultural Marketing Committee (DAMC) Hnahthial chu an chairman, bawrhsap K Vanlalruati kaihhruaiin Ningani khan an thukhawm a. Report danin, Bana Kaih Scheme hnuaiah sawhthing hi February 20 atang khan lei tan a ni a. Sawhthing hralh turten an chhunkhawmna, Secondary Collection Centre (SCC) 5 – Darzo, Cherhlun, Chhipphir, Tarpho leh Hnahthialah awmin, sawhthing chhunkhawm sa khulna tur hi sawrkar atanga sum an dawn milin thawh hniha pek chhuah a ni tawh a, kg.ah Rs.50-a khul a ni.
Thawhkhatnaah hian SCC 5 atangin quintal 664 khul a ni a, a vaiin cheng nuai 33.2 pek chhuah a ni. Thawhhnihnaah SCC 5 atangin quintal 475.58 an khul a, a khulnan Rs. 23,77,900 pek chhuah a ni.
Sawhthing khulnana sum pek tawh zat hi a vaiin Rs. 56,97,900 a ni a. State sawrkar atangin SCC-a sawhthing khulna tur sum nuai 150 dawn tawh niin, SCC-a buk tawh si, sum la pek chhuah loh nena chhut chuan sawhthing khulna atan nuai 51 mamawh belh a ni.
Sawhthing hralh leh hunah support price kalphung pangngai anga kalpui tum a ni dawn tih sawi a ni a. SCC hian sawhthing tender an chhuah anga, a chhangtu chhan zat milin loneitute chu sawhthing chawh tir an ni ang. Sawhthing chhangtuten an chhanna man hi kg ah Rs.50 a tlin chuan, a tlin lohna kha sawrkarin a tum ve thung dawn a ni.
Tuna sawhthing hralh chhuah first phase, February 20 atanga March 20 thlengin Hnahthial leh Cherhlun SCC-ah tender chhangtu an awm tawh a; an sawhthing duh zat demand an pe a. An ni hian kg.ah Rs. 20-in an chhang a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More