Hnahthialah a thlawna inentirna

Hnahthialah a thlawna inentirna
Indian Medical Association (IMA), Mizoram Government Doctors’ Association (MGDA) leh Indian Dental Association (IDA) tangho buatsaih, a thlawna inentirna – ‘Multidisciplinary Clinic’ chu Ningani khan Hnahthial district tan Hnahthialah buatsaih a ni. Heng pawlten multidisciplinary clinic an buatsaih vawi 10-na a ni.
Hnahthial bawrhsap Rita Lalnunmawii Pachuau chuan Hnahthial mipui mamawh ngaipawimawha doctor kalte hnenah lawmthu a sawi a. Inentir zawng zawngten damna an chan ngei a beisei tih a sawi a ni.
Clinic-ah hian inentirna hrang hrang – obstetrics and gynaecology (hmeichhe lam); nephrology (zunkawng leh kal); cardiology (lung lam); medicine; respiratory medicine; surgery; paediatrics (naupang); orthopaedics (ruh lam); dental (ha); ENT (beng, hnar leh hrawk); opthalmology (mit); dermatology (vun lam); psychiatry (rilru lam); PMR (tha na) leh audiology (beng lam) hawn a ni a. Pharmacy (damdawi lam) thiam leh endoscopy leh ultrasound hmanga damlo endiktu tur endoscopist leh sonologist an awm a ni.
Inentirnaah hian damdawi a thlawn a sem tur chu South Tuipui bialtu MLA Jeje Lalpekhlua’n a ruahman sak a. Clinic hi vawiin – October 25 hian neih zawm a ni ang.
Clinic-ah hian a vaiin doctor 50 awmin, supporting staff 11 an awm a. Doctor leh staff-te hi – Synod Hospital, Ebenezer Medical Centre, Zoram Medical College, Christian Hospital Serkawn, Civil Hospital Aizawl, District Hospital Hnahthial, Aizawl Hospital, District Hospital Serchhip, Kulikawn Hospital, Trinity Hospital leh Civil Hospital Lunglei atanga kal an ni.