Hnam leh sakhua ngaipawimawhtu Deputy CM kan chhuang – MNF

Mizoram tana hmalaknaah ram leh hnam bakah Kristian sakhua tan a him em, tih ngaihtuah hmasa ber zeltu, MNF senior vice president, deputy chief minister Tawnluia an chhuang hle tih MNF party chuan an sawi.
MNF Gen. Hqrs. Media & Publicity Department hruaitute chuan deputy chief minister Tawnluia chu sawrkar mai ni lo MNF party tan mi pawimawh tak a ni tih sawiin, nationlism khaidingtu ban pawimawh tak a nih thu an sawi.
Pathian nen lo chuan ka kal ngam tawh lo, titu Pu Tawnluia hi kum upa lam a nih tawh hnua natna khirh takin a tlakbuak atanga Pathian tihdamna a chan thu an sawi. “Mizoramah eng pawh lo thleng se, ram leh hnam tan a him em, kan sakhua Kristian tan a him em, tih ngaihtuah hmasa thintu hi kan chhuang a ni,” MNF Media & Publicity general secretary VL Krosshnehzova chuan a ti.
Zirna lamah science subject background a neih avangin technical thil thlengin Tawnluia hian a hrebel tih sawiin, a kum lam lo tam deuh tawh mah se, a department enkawl a hneh hle tih an sawi. A hona hnuaiah Public Health Engineering, Urban Development & Poverty Alleviation leh Personnel & Administrative Reforms chuan hma an sawn nasa tih sawiin, Zoram tan hna ropui tak tak leh chhinchhiah tlak tak tak thanhnem tak a thawk tih an sawi.
Assam Police-in 2021 July 26-a Mizoram duty post an luhchhuah tumin deputy CM hian, “Kan duty post hi tlai dar 5.00 hma in engti zawng pawhin kan lalet leh tur a ni,” a tih thu sawiin, chief minister Pu Zoramthanga nen sawidunin, thutlukna lian tak siam a ni tih MNF hruaitute hian an sawi a. Silai hmet puakin kan ramri kan lalet mai niloin, Mizoramin ramri ah nasa takin hma kan sawn phah tih an sawi a ni.