Aizawl khawpui chu hnamdang sumdawngin an awp deuh thaw tawh a, Mizoin an hming hawh tirin an sumdawn tir tih Central YMA president Lalhmachhuana chuan a sawi.Dampa Group YMA chuan March 12-14 chhung khan Damparengpuiah inkhawmpui vawi 49-na an hmang a. Hmanpuitu Central YMA president Lalhmachhuana chuan, Aizawl khawpui chhung chu hnamdang sumdawngin an awp deuh thaw tawh a. Mizo thahnem takin an hming hawhin hnamdang an sumdawn tir a, hnam tan a pawi tih a sawi.
“Aizawlah ber sumdawnnaa min chimral chuan Mizoram hmundangah pawh chak takin min la chim dawn. Dan loa sumdawng an tam em em a, hetiang kan hriat leh kan hmuh chuan YMA member-ten lo man a, lo hnawhchhuah zel mai tur a ni,” a ti.
Kan ramah ruihhlo a hluar a, lo veng theitu chu YMA a ni tih Lalhmachhuana hian a sawi. Ruihhlo vangin mipa an thi nasa a, hetiang a nih chuan Mizo nulaten pasal neih tur an hmu lo mai dawn a. Hnamdang pasalah an nei zel chuan chimralin kan la awm thuai a hlauhawm tih a sawi bawk. Mizote chimrala kan awm lohnan YMA member-te nasa lehzuala tan tlan a ngai tih a sawi.
Thenawm rama Zofa unau harsatna tawkte lo tuamhlawm nasa bertu chu YMA a ni tih Central YMA hruaitu hian sawiin, “Zofate tan YMA hi a hlu hle a, a la hlu tual tual dawn. YMA hlut chhan hi CYMA hruaitute vang a ni loa, YMA chu Pathian rinchhana din a ni a, YMA member zawng zawng avangin a hlu a ni. YMA hi Mizo zawng zawng, kohhran thliarhrang lo, political party pawh huapzo pawl a ni a, a ropuiin kan hnam tan a hlu a ni,” a ti.
Dampa Group YMA huamchhungah hian YMA Branch 12 a awm a. Tunah hian YMA member mipa 2563 leh hmeichhia 1172 awmin, an vaiin 3735 an ni.
Hnamdang sumdawng hoin Aizawl awp deuhthaw tawh – Central YMA president
Get real time updates directly on you device, subscribe now.
Prev Post