Hnar hmanga faifuk theiin record siam

Guinness World Record siam thei mak sak tak tak an tam a, chung zingah chuan tuna mi pawh hi telh chi a ni, a hnarin a faifuk thei! LuLu Lotus hian thiamthil dangdai zet mai a nei a, a hnar hmangin a faifuk thei a, Guinness World Record chuan hnar hmanga faifuk ring thei berah an puang.
LuLu hi Mississauga, Canada a cheng a ni a, hmeichhe naupang kum sarih mi lek a nih laiin a hnar hmangin a faifuk thei tih a hrechhuak a. LuLu chuan, “Ka hnar hmanga rimawi siam ka ti thei tih hi ka hriat chhuah hnuah chuan kan zirtirtute leh ka classmate te han fiam vel nana hman kha nuam ka ti khawp mai,” a ti.
LuLu chuan, “Guinness World Record siam hi ka thiamthil danglam tak mai lawmna a nih mai piah lamah ka thiante min support-na lawmna ni nghal teh se. Guinness World Record bu-a ka hming thailan ve hi ka duhthusam leh ka lo suangtuah ve rauh rauh thin a ni,” a ti bawk.
LuLu hian a hrawk tihrawl te chu a hnar lama boruak tichhuak a, ri siam thei turin a control thei a. A hmui chipin a hnar hmangin a faifuk thei ta a ni. A hmui a chip loh chuan hnar hmanga faifuk hi a tithei bik chuang lo.