Hnarkua a nawhalh kuang hnawh lut tam thei record siam

Record ropui tak a ni lo kan tihsak a nih pawhin Guinness World Record chu a siam ve miau si a ni. Denmark a cheng Peter von Tangen Buskov, kum 39, chuan a hnarkuaah nawhalh kuang 68 a hnawh lut thei a, record a siam. Hetiang record hi Guinness World Record pawhin an vawi khat tawnna a ni a, Peter-a’n record a siam theih em ti a Guinness lam a biak pawh chuan, Guinness chuan guideline te siamin, record siam theihna kawng an hawn sak a, an guideline-ah chuan record siam turin hnarkuaah nawhalh kuang 45 tal hnawh luh theih a ngai a ni.
Peter-a chuan, “Mak ang reng takin a na miah la,” a ti a, “Ka hnarkua hi a zau ve hrim hrim a, a vun hi a fân thei viau bawk. Hei hian record siamna kawng min hawn sak ta niin ka hria,” a ti bawk.
Eizawnna lamah chuan Peter-a hi business administration lama thawk a ni a, secondary school-a social science zirtirtu nih tumin a bei mek bawk. Tuna a record siam hi a hlimawm zawngin a kalpui a, “Record hlimawm tak siam theih tur ka ngaihtuah a, chuta tanga ka rilrua rawn lut ta a ni,” a ti a, “Tun hmain hnar kuaa thil hnawh luh hi ka tingai bik lo,” a ti bawk.
Peter chuan nawhalh kuang 68 bak chu a hnawh leng tawh lo niin a sawi a, mahse, engtikah emaw chuan he record hi amah ngeiin a la khum leh theih a inbeisei a, “Ka tan chuan hei aia tam hnawh lut leh tur chuan training leh deuh a ngai ang a, a nih loh pawhin ka lo upa deuh ang a, ka hnarkua pawh a zauh belh deuh mahna,” a ti.