Hnehna kailawna kirleh Verstappen

Hnehna kailawna kirleh Verstappen
Melbourne-ah khan kum 2022 chhunga a vawikhatna atan Red Bull driver chhuanvawr Max Verstappen chu a tlachhuak zo lo a, a chetchhiat belhchhah turin a one-two pui zak zak thin a team-mate Sergio Perez pawh lawmman semna dawhsan lawn pha lo zawngin -naah a thleng a, Pathianni Japanese Grand Prix-ah erawh Red Bull one-two ngai bawk kha kan hmu leh ta a, Suzuka Circuit, Suzuka-ah Dutchman a thleng hmasaber a, a dawtah Mexican Perez kan hmu chhunzawm.
Tarlan tawh thin angin, 2024 F1 world championship round 3-ah khan Scuderia Ferrari driver pahnih Spaniard Carlos Sainz pakhatna niin, a team-mate Charles Leclerc of Monaco chuan a dawt a, Asia khawmualpuia championship round four-ah erawh Red Bull ze dik tak kan hmu leh ta a ni.
World champion Max Verstappen kha Japanese Formula One bikah kum thum chhung pole luah chungin hnehna a chang zawn a, Melbourne-a pangana luah pha chauh Perez pawh insiamtha ve nghalin Suzuka tlankawngah Red Bull 1-2 kan thlirliam.
Australian Grand Prix-a tlanchhuak zo lo Dutchman Verstappen khan Australia leilungah vawikua ngawt a chakzawnna a thlah a, Japan-ah erawh a car khawl lam fel lo a dik chho ta a, tun season intlansiak vawiliah a vawithumna’n hnehna a chang.
Australia-a pakhatna Spaniard Carlos Sainz chuan Suzuka intlansiak tawp lamah tyre thar vuahin a Ferrari team mate Charles Leclerc a hmakhalh thei a, pathumnaah thlengin lawmman semna dawhsan hniam ber a luah a, palinaah Leclerc a thleng.
Hnehna a chankir leh hnuah a team-mate aia second 12.535-a thleng hmasa Verstappen chuan intlansiak hnuhnungber Australia-a harsatna chhete a tawh thu leh hnehna a chan zui leh theih avanga a hlim takzet thu a sawi.
Pahnihna Perez chuan drivers championship standing-ah Leclerc hmakhalhin pahnihna a luah chho leh ta a, a team-mate Verstappen lakah point 13-in a hniam.
Mexican chuan khawi tlankawngah pawh Red Bull an khawng hle vek thei tih sawiin, high speed corner-a an tlan chak theihna chuan kawng dikah a hruai tih a tarlang tel.
Season tharah Mercedes driver Lewis Hamilton chuan Ferrari driver seat luahin Sainz a nekchhuak dawn a, Italian team tana a season hnuhnungber hmang mek Spaniard Sainz chuan Japanese Grand Prix-a an chetchhiat chhanah strategy fuh lo a mawhpuh.
Suzuka tlankawngah McLaren driver Lando Norris chu panganaah thlengin, Aston Martin car khalhtu Spaniard Fernando Alonso parukna a ni a, Mercedes driver George Russell chu pasarihna niin, a team-mate leh seven-times champion ni bawk Hamilton pakuanaah a thleng a; pariatna luahtu chu McLaren driver Oscar Piastri niin top 10 tikimtu chu Visa Cash App RB F1 Team tana inlan Japanese Yuki Tsunoda a ni thung.
RB driver Tsunoda tan tun kha a home grand prix-a point a hlawhchhuah vawikhatna a ni a, Japanese fans lawm a hlawh ngang mai!
Japanese Grand Prix tlan zawhah Red Bull chuan point 141 khawl tlingin constructor standing-a an hmahruaina an chhunzawm a, Ferrari (120) leh McLaren (69)-in an dawt.