Hnehna nen a lerah Milan chuangkai
Hnehna nen a lerah Milan chuangkai
Thawhtanni zan inkhel pakhatah 3-2-a mualneitu Torino hneh chungin AC Milan chuan Italian Serie A table-ah dinhmun sang ber an luah chho.
Milan hian league khelh 14-ah point 31 neiin, Pathianni zana an mikhual Juventus hnehtu Napoli chu point-ah an nihrual a, goal difference-ah goal khata an chungnun zawk avangin Naples khaw team hmahruaina hi an chhuhsak zui ta a ni.
Inrinnia sili faia an mikhual Como sawptu Inter Milan chuan point 30 hum chungin table-ah pathumna an luah ve bawk.
Turin khuaa Stadio Olimpico Grande Torino inkhelah AC Milan tan ‘super sub’ Christian Pulisic a chepui a, a hnufual zawk an nih rengna inkhel second half-ah goal hnih thunin an mikhualna mualah a team a chakpui.
Thla hmasaa sikhat faia Lazio an hneh tuma referee thutlukna a sawisel avanga mual sir atanga a team-te inkhel tawiawm thei loa an manager Max Allegri hrem a nih zanah Milan khan si an chhuah hmasa.
|an atanga minute 10-na lekah Fikayo Tomori handball avanga an penalty hmuh chu Torino player Nikola Vlasic chuan a pet a, Milan goalkeeper Mike Maignan chuan khawih fuh hman bawk mah se a dang zo lo a, sikhat faiin mualneitu team-in hma an hruai phawt.
Minute sarih an khel tling leh tihah Torino lam bawkin an goal hnihna thun lehin, Duvan Zapata tihluh a ni.
Si hnih an phurh hnuah Milan an harhchhuak a, minute 24-ah Adrien Rabiot chuan metre 30 vel zeta hla atangin an siphurh pakhat zawk sut a then.
Thapui thawha an siphurh sut zawh an tum lai takin tlarhma lama Milan innghahna lian pakhat striker Rafael Leao chu darkar chanve an khel pel awrh tihah hliam avangin a bai chhuak a; half time hmain goal dang a luh belh lo.
Second half-ah mi khual lamin an nawr chhunzawm a, vawi duai lo an siphurh sutna hun remchang an bawhpelh hnu minute 67-ah khelmual lut fel hlawt Pulisic chuan Milan goal hnihna a tilut zui zawt a; minute 10 a kal leh tihah American bawk hian a goal hnihna leh San Siro club chakna goal ni zui ta a thawh zui leh a, home supporter a ngawihtir chiang teh e!
Bench lama Christian Pulisic thuttir a nih tur thu inkhel tan hmaa sawitu assistant coach Marco Landucci chuan American-in hritlang a kai tih a sawi.
3-2-a hma an hruai hnuah Milan lamin hun tawp rat thlengin inkhel an thunun zui ta a; Pulisic pawhin hat-trick siamna tur goal khat khung belh leh mah se goal intintuah chhoh laia offside avangin a goal thumna tur pawmsak a ni lo.