Hnehna nena bul \an Khawbel
Hnehna nena bul tan Khawbel
June ni 23, 2026 thleng awh tur Mizoram Rural Bank Pro Volleyball League chu May ni 11, Thawhtanni khan LPS Arena, Falkland, Aizawla khelh tan niin, Thawhlehni zan khan Aizawl khaw pawn mipa team awmchhun pahnih Khawbel leh Tuichangral intawngin, kut hnathawh uar khua tia hriat hlawh Khawbel hian Round 1 bul an tannaah 25-21, 25-22, 11-25, 22-25, 15-13 (3-2) hnehna an chang.
Khawbelin trophy chuh phak an tum tih a takin an lantir a, set hmasa pahnih an lak hnuah tla hniam mah se set hnuhnung berah kir lehin fiahna tling inkhelah an chak.
A vawi khatna’n season liamta khan Mizoram volleyball inelna sang berah Khawbel an tel a, semi-final-ah tlain league-ah set thum faiin Tuichangralin an hneh bawk a, Pro Volleyball-a an intawn lehna hmasa berah he tlawmna hi an chhanglet nghal a ni.
Mizoram pawn player zinga Pro Volleyball-a tawnhriat ngah leh nei tha ber Anurag Rawat chuan set nga an inkhelh chhungin point 35 a hmu. Johan Vanneihsanga nen inthlawpin an pahniha point hmuh belh khawmin 56 a tling a, team pum pui point hmuh chanve aia tam hlawh chhuakin point 34 an paih tel bawk.
Pro Volleyball-a vawi hnih an telnaah Khawbelin an khaw player deuh vek an hmang a, squad member zingah Delhi tlangval Anurag leh setter David Lalramhmachhuana chiah an khaw mi ni lo an awm. Feet 6 leh inchi 4-a sang Anurag hi Tuipuiral leh Huntharah khel tawhin, Pro Volleyball-a season li a telna a ni a, kum 2024 khan Hunthar a champion-pui tawh a ni.
Vawi hnih final-a tlawm tawh Tuichangralin a tum khatna’n champion an tumna kawngah harsatna an tawk nghal.
Sri Lanka atanga an lak luh Mahela Indeewar chuan Mizorama a khelh hmasak berah beisei angin hnuhma a nei tawk lo a, set hnihna thlengin team pum pui an insiam rem hman lo bawk.
Mahela hian point 29 hmuin 13 a hloh a; Saidingpuia Sailo leh Lalrinpuia’n point 18 ve ve hmu bawkin inhnehtawk tak chungin a bet zawkah an tang a, set hnih an lak avangin point khat sual chhuak mah se a chak zawk Khawbelin point hnih an hmu ve thung.
Nizan mipa Round 1 inkhel result tarlan hman lohah Sihphir leh Chhinga Veng Spikers an intum.
Kuriz Player of the Match
– Anurag Rawat (Khawbel)
Cheetak Fan of the Night
– Diki (Khawbel)
FIXTURE (mipa) – ROUND 2
May 14, 2026 (Ningani)
8:00 PM : Khawbel v Anastasia Electric Veng
May 15, 2026 (Zirtawpni)
8:00 PM : Hunthar v Sihphir
May 16, (Inrini)
8:00 PM : Thutak Nunpuitu Team v Tuichangral