Hnehna nena bul tan Barca

Hnehna nena bul tan Barca
Spanish Primera Liga season thar bul tan takah Inrinni khan Robert Lewandowski goal hnih tihluh hmangin Barcelona chuan 2-1-in mualneitu Valencia an hneh a, top flight league-a Valanecia a hmachhawn tawh vawiliah Pole hian goal ruk a thun tling der tawh a ni.
Barca hian boss thar Hansi Flick hnuaia an game hmasaberah hnehna an chang nghal a; tunkar Inrinni hian La Liga game an khelh leh turah Athletic Bilbao an hmachhawn leh ang.
Germany boss hnuaia Catalan team-in league an khelh vawikhatnaah hian chawlhlawk dawn minute 44-ah Hugo Duro chuan Diego Lopez-a cross chhawrtangkaiin Marc-Andre ter Stegen-a ven goal-ah mualneitu team hmahruaina goal a khung zet a, half time hma chiah hun pekbelhah Robert Lewandowski chuan Lamine Yamal-a ball pek tha zet hmangin Nou Camp club siphurh a sut a, goal khat ve ve thunin team pahnihin chawlhlawk an hmang.
Second half tan hnu lawk minute 49-ah veteran striker Lewandowski bawkin penalty spot atangin Barca hmahruailetna goal a chhuihlut a, he penalty hi box chhunga an tihtluk avanga Raphinha hlawhchhuah a ni.
Kumin European Championship-a hming chher Yamal chuan goal thun ve ta chiah lo mah se hun pumin rawlthar hlauhawm bik a nihna a lantir tluanchhuak leh a, kum 17 mi hian a sir tluan atangin vawi duai lo Valencia a rum thaih.
Valencia lam hian an siphurh sut tumin tan han khawh na viau dawn thin mah se midfield-ah an tha a zuai leh tlat thin a, counter-attack chu an innghahna lian a nih mai a ngai a, tah hian an hlawhtling lek lek thin nain Flick-a naute’n goal dang an chhuah belh duh ta lo a, away khelmuala point thum rut chungin league season bul an tan.
Season liamta khan Barcelona hian point 10 zeta champion Real Madrid pha loin runners-up an ni a, kumin hian an star player ni chho mek Lamine Yamal chuan ei a rawn tling chho zual dawn niin a lang a, Bernabeu club kuta title awm hi chhuhsak zo tak ang maw?