Hnehna nena bul tan Novak Djokovic

Hnehna nena bul tan Novak Djokovic
Mipa leh hmeichhia sawi loa tennis player zinga Grand Slam title 25 la tling thei hmasaber nih tuma a beihna tharlam ber ni mekah Pathianni khan Serbia superstar Novak Djokovic chuan hnehnain US Open bul a tan a, first round-a a tumpui Learner Tien lakah 6-1, 7-6(3), 6-2 hnehna a chang.
American rawlthar a hnehna inkhel kha thla hmasa Wimbledon semi-final match hnu lama singles match a khelh leh vawi khatna niin, kum 38-a upa ni ve tawh Serb khan taksa lamah tunhma pha tawh chiah lo mah se a tum 80-na atan Arthur Ashe Stadium-ah hnehna a chang.
Kum 1968-a professional huanga tennis an leh hnuah seventh seed Djokovic kha Grand Slam opening-round match-a tum 75 chakzawn thei hmasaber niin, chu’ng zinga match 55 phei chu straight sets hmanga a chak a ni nghal.
Pathianni match lai hawlah Djokovic kha hliamin a tibuai a, chawlh hun a hman rei avangin chair umpire khak hial hlawh mah se inhnuhdawh ngai loin a khel tluan thei.
American rawlthar kum 19 mi Tien khan 2006 Australian Open hnu lama Grand Slam first round-a la tlawm ngai lo Djokovic kha barakhaih tum viau mah se a theihna piahlam a ni rih!
A kephah ding lam na avanga harsatna tawk Djokovic hian a tum ngana atana New York champion nih a tumna kal mekah American dang Zachary Svajda a tum leh ang.
First round match dangah USA player 2023 semi-finalist Ben Shelton pawh Peru qualifier Ignacio Buse lakah 6-3, 6-2, 6-4-in a chak a; 2024 finalist Taylor Fritz chuan 7-5, 6-2, 6-3-in a chipui Emilio Nava a hneh bawk.
Fourth seed Fritz leh sixth seed Shelton-te hi kum 22 chhung zet US mipate’n tualchhung Grand Slam title an lak zawh loh hnua America innghahna an ni mek.