Hnehna nuamsa nena bul tan Sinner

Hnehna nuamsa nena bul tan Sinner
US Open inbuatsaihna hnuhnung Cincinnati Open final an khelh laiin damlohnain a tlakbuak a, khel zo thei loin world number one Jannik Sinner a lo tlawm tawh a; men’s singles atana chawlhahdamin US Open mixed doubles atangin a inhnukdawk bawk a, Thawhlehni khan Flushing Meadows, New York-ah bul a tan ve thei a, straight-set hmanga Vit Kopriva hnehin first round a paltlang ve ta phawt.
Sinner hian 2024 US Open final-ah American Taylor Fritz hnehin, kumin hian defending champion ni chungin bul a tan a, world number 89-na Czech player Kopriva lakah darkar khat leh minute 38 lek chhungin 6-1 6-1 6-2 hnehna awlsam a sualchhuak.
Arthur Ashe Stadium-ah khan kum 24 mi Italian kha a la damkawr tih a la hmuh theih deuh nain harsatna a tawk lo a; karliamta Cincinnati Open final-a Carlos Alcaraz nen an intum lai pawh khel zo thei loa a inhnuhdawh boruak nen chuan a dang ta daih a, Kopriva a hneh hnua an kawmnaah a hriselnain ngai a awh chhoh leh tak avangin a hlim hle tih a sawi a, a hmaa a taksa dinhmun ang ngai chiah luah chho leh tura theihtawp an chhuah thu a tarlang tel.
New York khuaa a main-draw debut nghakchhuak ve ta Kopriva khan hard-court Grand Slam bika match 22 chak zawn thei Sinner lakah khan harsatna a thlen zo lo a, major tournament hnuhnung palia vawi thum champion thei Italian hi US Open khelh mekah pawh a title kawl lai humhim leh tura beisei a ni mek.
Nikum US Open title a lak hnu khan Sinner hi kumin January thla Australian Open leh June thla mai Wimbledon-ah a champion leh a, kumin Grand Slam tournament khelh tawha a tlawm awmchhun chu June thla French Open final pui zeta Spaniard Alcaraz a hneh loh chiah kha a la ni!
Sinner hian second-round lamah Australian world number 36 Alexei Popyrin a tum leh dawn a, Popyrin hian first round inkhel dangah Emil Ruusuvuori of Finland chu straight sets hmangin a hneh ve bawk.
Men’s singles first round dangah Sinner-a chipui Italian 10th seed Lorenzo Musetti chuan big-serving Frenchman Giovanni Mpetshi Perricard chu 6-7 (3-7) 6-3 6-4 6-4-in a tukdawl.
Kazakhstan 23rd seed Alexander Bublik pawhin veteran Croat leh 2014 US Open champion ni bawk Marin Cilic lakah 6-4 6-1 6-4 hnehna chang, Canadian 27th seed Denis Shapovalov chuan 6-0 6-4 6-4-in Hungary player Marton Fucsovics a hneh ve bawk.