Hnute cancer tur ven nan mut \hat leh dul tihthep a pawimawh

India-a hnute cancer hi kumtin 6% velin a pung niin ICMR zirchianna chuan a tarlang. Mut that loh, rilru hah leh vei ngah lutuk reng mai te leh tau lutuk, dulkiar kan tam ta te chu hnute cancer risk tisangtu zingah a tel niin an tarlang. Dharamshila NarayanaHospital, Delhi-a director of Surgical Oncology, Dr Shubham Garg chuan hmeichhe kum naupang deuh zawk zingah pawh kan nitin khawsak phung lo danglam ta avangin hnute cancer case hi a pung zel niin a sawi a, hnute cancer risk tihhniam nana tha ni a sawi, Times of India-in a tarlan te kan rawn chhuah chhawng e.
National Centre for Disease Informatics and Research-in tunhnaia zirchianna an neih atanga an hmuh danin zan mut that loh hian melatonin leh setrogen indiam dan a tibuai a, DNA repair thlengin a nghawng thei. Chutihrualin zan mut that loh ringawt chu hnute cancer thlentu (standalone cause) a ni chuang lo a, taksa a thau tam lutuk, rilru hah leh vei ngah lutuk te, awm awl leh eitui, hmuihmer ei nasat te pawh India hmeichhia te zinga hnute cancer risk tisangtu zingah a tel niin an tarlang.
Hmeichhe thenkhat, an thisen zawmpui hnaivai zinga hnute cancer hriat tur awm lo te zingah pawh hnute cancer hriattur an tam ta a, chung zingah chuan zan mu tha lo, zan lama hnathawk chi, rilru hahna leh vei ngut ngut ngah leh taksa a thau tam an tam hle.
Thau chiah pawh dulkiar chi, dul bawra thau tam te tan hnute cancer risk hi a sang thei a, Cytokines siamin, insulin resistance a awmtir thei a, estrogen a lo titam thei bawk. Thihul hnuah adipose tissue (thau timai ila) chu estrogen siamtu ber a ni ta a, chu chuan hormone-receptor-positive breast cancer risk a siam thei.
Hnute cancer risk tihhniam nan khawsak phung tihdanglamin awmzia a nei thei hle niin an tarlang a. Zan mut that hian circadian rhythm a siamtha a, melatonin level a siamthat bakah immune function a titha bawk. Stress kan control hian cortisol exposure rei tur a tihniam a, chu chuan hormonal imbalance tur a siamtha thei. Dulkiar tih thep hian estrogen insiam tur a tihniam a, insulin sensitivity a titha a, inflammation tihniam thei bawk. Heng danglamna te hian hmeichhe hnute cancer risk a tihniam thei a, hnute cancer inenkawl dam tawhte zingah pawh a rawn lan nawn leh theihna risk a tihniam thei bawk.
Kan stress nasat hian taksaah cortisol level a tisang a, chu chuan immune surveillance a tibuai a, kan taksain abnormal cell a tibo tur a lo tibuai thei a, chutiang a nih chuan systemic inflammation a lo awm a, glucose metabolism leh estrogen a tibuai a, chu chu tunour insiamtir thei leh tumour awm tawhsa tithang thei a ni. A lo rei hnuah phei chuan cancer insiamna kawng a lo inhawng ta thin a ni.
India-ah hian hmeichhia kum 35-50 inkarah pawh hnute cancer hriatchhuah a pung hle a, hei hi awm âwl leh hmuihmer ei tam, central obesity, zan mut that loh, rilru hahna leh vei ngah lutuk, fa neih har (delayed childbirth) leh naute hnute hnek tir loh (reduced breastfeeting) te a tam tak vang a ni thei a, heng factor-te hi khawthlang ramah te pawh hnute cancer risk tisangtu tho a ni. Inthlahchhawn (genetics) avanga hnute cancer risk a awm a, chumi piah lamah heng factor hrang hrang avang hian kum naupang lamah hnute cancer risk a sang zel a, Indian hmeichhia te zingah hnute cancer hi hriatchhuah a tlai duh hle mai a, chuvangin chuvangin hmeichhe kum 30 chunglam tan hnute cancer screening neih fo a pawimawh hle a ni.