Hockey coach sumin mual chei a ni ta !!

Hockey coach sumin mual chei a ni ta !!
Kar hmasa lama kan lo tarlan tawh ang leh a lo tiam tawh ang ngeiin Miss Lalrampari (Miss Pari), retired NIS coach chuan Durtlang Hockey Association (DHA) Academy naupangte practice ground a cheithatsak ta!
Chhuak hmasa lama kan tarlan tawh ang khan M. Suaka Veng, Durtlanga DHA Academy naupangte practice ground zim lutuk leh rualrem lo lutuk, side drain awm loh avanga harsatna nasa tak an tawh thinna chu Miss Pari hian en thei loin, ama sum sengin karliamta Ningani atang khan JCB leh tripper-te ruaiin, a theih ang angin a cheithatsak ta a ni.
Miss Pari chuan tuna an khawih lai bakah hian ngaimawh a la neih nual thu leh chu’ngte pawh chu remchang hmasabera khawih zui leh tur a nih thu a sawi.
DHA hruaitute leh member-te chuan hetiang taka hockey game hmangaihtu leh hockey hmasawnna tura ui nei lo leh theihtawp chhuahtu hruaitu tha leh chak an nei hi vannei an intiin an lawm takzet thu an sawi.
Durtlang Hockey Association hi kum 1996-a din niin, Mizorama hockey association nung ber leh Mizorama hockey game chawinungtu bera ngaih theih an ni.
Khelmualah pawh DHA hian hnuhma hraw tak tak an lo hnutchhiah nual tawh a, Mizoram pum intihsiakna leh Republic Day Hockey Tournament-ahte pawh an lo champion fo tawh thin a, anmahni ngei pawhin tournament-te pawh an lo huaihawt fo tawh bawk.
Tin, International player (Rosalind Lalchhanhimi Ralte) pawh nei tawhin, NIS coach ringawt pawh panga lai an lo nei tawh a; national umpire hi pahnih an nei mek bawk.
DHA Academy pawh hi NIS coach leh DHA hruaitu hlun ni bawk Miss Lalzawnchhungi (Miss Mazawni) chuan thutchilhin, Mizorama tualchhung/local academy-ah chuan hlun ber leh nung ber an ni bawk.
Coach taima leh inpe zo Miss Mazawni chuan DHA Academy chu kum 2018-a din a nih thu sawiin, hripui len vanglai kum 2020 leh 2021 lockdown lai tih loh kha chuan coaching hi chhum lo chat loa kalpui reng a nih thu a sawi a, naupang pawh 60 chuang lai te an neih thin thu a sawi.
Coach sawi zel danin, an academy-a zirlai hmeichhia 14 leh mipa pariat lai chu Thenzawl SAI Hockey Academy leh Kawnpui Boys Hockey Academy-ahte zir chhunzawm tura thlan an nih tawh thu a sawi lang tel bawk.
A zirlai naupangte an zelthel leh an inthlahdah dawn pawha dawhthei tak leh thahnemngai taka fuiha huikhawm thintu Miss Mazawni chuan DHA Academy-a bul tan hmeichhe tleirawl pathum lai chu India ram aiawha khel thei turte chherna hmunpui National Centre of Excellence (NCOE)-a chher hriam tura thlan an nih thu leh tunah hian Kolkata, Delhi leh Imphal-ahte an awm mek thu a sawi bawk.
DHA hruaitute chuan an theihtawp leh an phak ang tawk tawka an humhalh leh an lo cheibawl thin, an academy naupangte practice-na hmun M. Suaka Veng ground chu hockey ground pakhat mah awm lohna kan Aizawl city chhung ngeia hockey ground puitling atana siam mai theih awmchhun leh remchang ber a nih thu an sawi.
An thuchhuahin a tarlan zel danin, tuna kan sawrkar tha tak, hockey game ngaihsak em emtute chungah hian beiseina sang tak neiin, an academy naupangte practice ground chu hockey ground puitlinga siamsak an nih hun tur chu nghakhlel taka an thlir reng thu Post Sport an hrilh.