Hollywood starMichael Madsena thi

Hollywood star hriathlawh tak Michael Madsen, kum 67, chu July ni 3 khan a thi. Madsen thihna chhan hi cardiac arrest (lungphuchawl) niin a manager Ron Smith chuan a sawi.
Thuneitu ten July ni 3 zingkara emergency call an dawn bawhzuiin, Malibu-a Michael Madsen chenna in an thlen chuan a lo thifel tawh niin sheriff’s department chuan an tarlang a, a thih danah hian midang kut tuar a nih theihna awm hnuhma an hmu lo niin an tarlang bawk.
Madsen hi Hollywood khawvelah kum 40 chuang a inhmang hman a, film siamtu lar Quentin Tarantino nena an inkawp fuh thei a, ‘Reservior Dogs’ leh ‘Kill Bill: Vol 2,’-a an thawh dunna te pawh Madsen hian a larpui hle a, hei bakah hian ‘The Hateful Eight’ leh ‘Once Upon a Time in Hollywood’-ah te pawh an thawk dun a, ‘WarGames,’ ‘Spices’ leh ‘Thelma & Louise’-ah te pawh a inlan.
Madsen hi nikum September thla khan a nupui DeAnna Madsen nen an in\hen a, a nupui zawk hian Madsen hi a tiduhdah (domestic violence) \hin niin report a awm a, Madsen pawh hian domestic violence hlauhthawnna avangin a nupui a hnaih theih loh nan court-ah restraining order a ngiat hial a ni.
Madsen leh DeAnna te hi 1996-a innei kha niin, kum 28 an inneih chhungin fapa pathum- Luke, Kalvin leh Hudson te a nei a, Hudson hi 2022 khan a thi a, a thih chhan hi mahni intihlum ni a tarlan a ni. Madsen hi zaithiam lar Cher laizawn Georganne LaPiere nen 1984-1988 inneiin, 1991-1995 khan Jeannine Bisignano nen innei lehin, fapa Christian leh Max an nei a, Dana Mechling nen fanu Jessica a nei bawk.