Home dept chiahin tihlawhtling I- Day boycott mai tintuah tawh

Chawngte khua in an mamawh an ngenna chuan ngaihpawimawh a hlawh kim loh em avangin kumin Independence Day boycott mai tintuah a ni.
Joint NGO Chawngte chu Inrinni khan an thukhawm a. Chawngte Community Health Centre leh Police Station-a thawktu leh an mamawh dang dahbelh sak tura an ngenna leh, Chawngte khawchhung kawng siam chungchang sawrkara an thlen tawha hma lak zel dan tur an sawiho.
Chawngte khawtlang mamawh sawrkara an thlen chungchang report ngaihthlak niin, Home department atangin Chawngte Police Station-ah police 8 dahbelh sak an ni a. PWD minister hnena Chawngte khawchhung kawng chungchang an thlen chu duhthusama sawrkar atanga hmalakna a awm lo. Health minister hnena an thlen, Chawngte CHC-a thawktu leh hmanraw indaihlohna chungchang pawh hmalakna duhthusam a la awm lo a ni.
An mamawh an thlen angte chu August 13 thlenga a hlawhtlinna an la hmu lo a nih chuan, Chawngte ah kumin Independence Day – August 15 chu boycott nise an ti.
Joint NGO Chawngte hian Mizoram sawrkar hnena an khawtlangin an mamawh chi hrang hrang an thlen thin chu tih hlawhtlin a nih loh avangin kumin July 18 khan thuthar thehdarhtute kaltlangin an thlen nawn a; August 13 thleng an ngaihchan tur thu an lo sawi tawh a ni.
Joint NGO-ah hian Chawngte khua NGO lian zual – YMA Group leh Branch, YLA Sub Hqrs leh Branch, Central Young Chakma Association, LDSA, MCSU, MSU, MZP, Central Chakma Mahila Samiti bakah Chawngte ‘P’ Thalai Pawl te an tel.