Home voting nei tan mek

Election Commission of India chuan voter tam thei ang berin vote an thlak theih nan polling station-a vote thlak harsatna nei, kum 80 chunglam zing ami leh pianphunga harsatna nei (Persons with Disabilities) te chu an chenna inah inthlan buaipuituten kalchilhin vote thlak tir mek an ni a. District tam zawk chuan October 30 atang khan kalpui tanin, October 28 atanga kalpui tawh leh October 31 atanga kalpui tan tur an awm a ni.
Aizawl district-ah chuan mahni in atanga vote thlak dil mi 900 chuang an awm a. Postal ballot-a vote thlakin, home voter-te hi an ina kalchilha buaipui ngaite buaipui turin team 25 siama tirhchhuah an ni.
Aizawl bawrhsap chuan home voting hi Mizoramah chuan inthlanpuia hman vawikhatna a nih avangin thenkhat tan la hriat loh palh awm thei a ni, tiin, inthlan awm zel turah tangkai zawka hman a nih zui zel a beisei tih a sawi.
Khawzawl district-a Assembly constituency awmchhun – Tuichang bialah chuan home voting facility dil mi 142 atangin 112 te dilna pawmsak an ni a. Polling team 6 te chuan inthlan hmanrua nen bial chhung khaw hrang hrang an tuam tan a ni.
Champhai district-a Assembly constituency pathum – Champhai North, Champhai South leh East Tuipuiah kum 80 chunglam mi 90 (Champhai North 49, Champhai South 30 leh East Tuipui 11) in an hming an pelut a, mi 86-in vote an thlak. PwD zingah hming pe lut an awmlo. Home voting kaltlanga vote thlak tumte buaipui turin polling party 9 ruat an ni.
Siaha district-a Assembly bial hnih awmah, Saiha-ah home voting tura hming pelut mi 69 awmin Palakah mi 84 an awm. Inthlan atana lirthei hman tur (requisitioned vehicles) driver leh conductor-te pawhin Thawhtanni khan Siahaah vote an thlak a. Saiha bialah mi 31 leh Palak bialah 19 an ni.