Horti Fair-ah nuai 300 hmu tawh

Horti Fair-ah nuai 300 hmu tawh
Kum 2012-a bul tan Horticulture Fair atangin kum 2024 thleng khan Rs. 346,30,607 an leichhuak tawh.
Kumtin fur ruahtui dawn tan hun, thei leh thlai chi hrang hrang phun hun mil ber tura ngaih May leh June thla tir lam inkara neih thin ‘Horti Fair’ chu kumin atan Thawhlehni atang khan neih tan a ni. Horticulture minister C Lalsawivunga’n a hawng.
Horticulture department hotute chuan, Mizorama thei leh thlai chi hrang hrang chingtu, pangpar chingtu leh a zuar thin, thei leh thlai atanga ei tur vawnthat theih siamlama tuimite pualin Horticulture Fair hi Aizawla buatsaih thin a ni a. Horticulture thlai chingtu leh zuar thin tan ‘Buyers & Sellers Meet’ lian tak a ni chho ta tih an sawi.
Kumin hian pangpar stall 128, thei tiak 60, lei tha, hmanrua leh thildang 11, pot 6, a vaiin stall 205 an inpho a. Fair buatsaih rual hian kumtinin district tin atangin ‘Best Horticulture Farmer’ thlanchhuah a, chawimawina thuziak leh sumfai pek thin an ni. Kuminah pawh mi 11 thlan chhuah niin, horticulture technology, infrastructure, components, scheme adt. hmang tangkai leh hmasawnna nei tha thlan thin an ni tih an sawi a ni.
Kumin atang hian district hrang hranga Horticulture department-a thawkten inelna thianghlim an neih theihnan ‘Best Performing Horticulture District Award’ siam thar a ni a. Hemi thlang tur hian directorate-ah Technical Selection Committee siamin, an ni hian tehfung hrang hrang siamin an thlang chhuak a. Lawmman atan Rs. 30000 leh chawimawina thuziak hlan an ni. Kumin atan Saitual leh Champhai district chu pakhatna an ni ve ve.
Horti Fair-a lei chhuah zat
Kum Stall zat Sum lakluh (Rs.)
2012 57 17,39,306.00
2013 75 22,90,367.00
2014 70 12,47,142.00
2015 84 17,31,030.00
2016 103 34,36,520.00
2017 140 45,97,415.00
2018 172 44,94,060.00
2019 219 66,41,330.00
2022 172 24,00,188.00
2023 177 33,63,248.00
2024 202 26,90,001.00
Total 346,30,607.00
* 2020 & 2021 ah Covid leng vangin neih a ni lo