Horticulture College dincham lawm

Horticulture College dincham lawm
College of Horticulture Thenzawl din champha vawi 9-na chu Nilaini khan anmahni hmunah lawm a ni a. Agriculture minister PC Vanlalruata’n a hmanpui.
College of Horticulture Thenzawl chu zirtirtu tha tak tak leh state hrang hrang atanga lokal zirlaite thawhrimna avangin zirna tha tak leh zirlai tha tak tak chherchhuaktu a ni tih minister hian a sawi a. Agriculture lama zirna leh thiamna hi loneitute hlawhtlinna thlentu a ni tiin, he college pawh hian an thiamna hmangin kuthnathawktute vawi tam an lo pui tawh thin tih a sawi a ni.
College dean Dr Shri Dhar pawhin horticulture chu Mizoramah development thlentu pawimawh tak a ni tih a sawi a. Mizoram ei leh bar zawnna kawngah chak lehzuala hmasawnna hmuh theihna tur a nih a beisei thu a sawi bawk.
College of Horticulture hi 2016 June 18 khan Selesih-ah din a ni a. 2019 July 1 atangin tuna an awmna Thenzawlah hian an awm. Campus hi hectare 120.38 a zau niin, teaching staff 13, non teaching staff 6 leh contractual staff 16, security 12 an awm a ni. Zirlai mipa 39, hmeichhia 57 an vaiin 96 an awm. Mizoram-in seat 6 quota a nei mek.