Comptroller and Auditor General of India (CAG) Report No. 2 of 2022-in a tarlan danin, kum 2018-19 chhunga NEDP hnuaia link road laih chu March- April 2021 chhung khan audit team leh departmental official-ten an endik a.
Link Road endikte hi Division pathum – Aizawl, Serchhip leh Lunglei hnuai ami Link Road 134 a ni a. Heng Link Road endik zingah hian thil mak tak tak hmuhchhuah a ni a; a nih dan tur anga thawh loh te, dik lo baksaka sum tih chingpenna te a awm a ni.
Link road 13 laih nana excavator hire anga receipt leh measurement books-a record te endik a nih hnuah darkar 50-500 vel inkar chu link road 13 laih nana excavator hire anga record niin heta sum chingpen (excess payment) hi cheng nuai 72.15 a tling a. Excavator rawih (hire) thenkhat chu register number atanga chhui chian a nih hnuah scooter te, motorcycle leh Gypsy number te a lo ni hlawm a, hiring charge atana sum sen zat hi cheng nuai 110 a ni a. Dik lo taka excavator rawih nana sum chingpen hi a vaiin cheng nuai 222 a tling a ni.
Heta tang ringawt pawh hian cheng nuai zathum thuak chu dik lo takin sum tihchingpen a ni tih a hriat a. CAG chuan he thil thlengah hian a mawhphurtu official-te zawn chhuah a, pawisa hlohte hmuhkir a nih leh theih nan FIR thehluh mai a tul thu a tarlang a ni.
Horticulture leh Agriculture hi Mizorama kuthnathawktu tam berte innghahna a ni a. Sawrkar pawhin heng mite tan hian, kum tin ramngaw thiat lo zawnga eizawnna an neih theih nan, sum chang thlai heng thei leh huan thlaite chinga eizawnna ngelnghet an neih theih nan ruahmanna a siam thin a. Mipuite hmasawnna tura thawk tur (sawrkar hnathawk)te berin hetia ‘Zawngrengtea serthlum veng’ an sawi ang maia an lo tihchingpen zel chuan mirethei ten lei rem rah hun an nei ve dawn lo a ni.
Dik lo taka mipui chanai khawih chingpentute hi ngaihhnathiamna kan neih zel chuan ramin hma a sawn ngai dawn lo tihna a ni.
Horticulture Link Road
Get real time updates directly on you device, subscribe now.
Prev Post