HOSTEL ROOM NO.13

Prof. Lianzela

Gauhati University-a Post Graduate (MA) kum hnih chuang (exam an sawn hlat thin avangin kan zir rei a) ka zir chhung zawng Gauhati University Hostel RCC 3, Room no.13-ah hian ka roommate nen kan awm a. Ka roommate H. Sangcheman MA Political Science a zir a, keiin MA Economics ka zir thung. Tun tumah hian kum hnih chuang RCC 3 Hostel Room No.13-a ka awm chhunga ka thil tawn theihnghilh harsa ka tihte ka rawn thai lang dawn a ni.
1. RCC 3 Hostel leh Room No.13 hi ka duha ka thlan a ni lo: Duhthlang thei ila RCC 3 Hostel hi ka thlang reng reng lovang. He hostel hi class kan neihna building nen a inhlat a, Gauhati khaw lumah chuan zirlaiten awm an chaklohna an hnawl fo thin a ni. Mahse kutdawhin duh a thlang thei lo (beggar has no choice) tih angin min pek chhun chu lungawi taka ka pawm a ngai!
Number 13 hi khawvela number ‘luck’ lo (unlucky number tih) a ni. Hotel tam tak hian Room No.13 an nei lo, miin luah/chen an hreh thin vang a ni ngei ang! (Number 13 an duh lohna- puithuna thil nena an sawi zawm dan chu – Zanriah hnuhnung Isuan a zirtirte a kilpuia Juda Iskariota chhuak, a inawk hlum ta kha an ni ho (groupa) 13-naah an ngai a, chuvangin an duh lo/ an hnual suat ta a ni tih a ni) Kan hostel-a Room No.13 hi room dang aiin a te lehnghal a. Chubakah Dinning Hall a hnaiha, a bengchheng bik tih a ni. Hengte avang pawh hian mi duh vak loh a ni. Mahse thuneitute min pek chhun a ni miau a hnial thei pawh ka/kan ni lo!
Room No.13 chu ka duh emaw duh lo emaw ka awmna tur a nih miau avangin MA ka zir chhung zawng ka awmna a ni ta. Ka roommate H.Sangchema hi a rawn awm regular thei vak lova, kum hnih chuang Room No.13-a ka awm chhung khan mahnia awm (single room-a awm) ang ka ni mah mah. |hiante an lo leng tal tal thina kan hlim thei viau a ni.
2. Mumang min thawng tak ka nei: Hostel-a ka room-a zan dang ang bawka ka mu chuan mumang ka theihnghilh tawh ngai loh tur ka nei ta tlat! Ka mumangah chuan ka thianpa College kan kal laia thi tawh, chiang em em maiin ka hmu a. Ani nen hian St.Paul’s School-ah High School kan kal ho a, thian pali/panga inkawmngeih zual kan awm. Ka mumangah ani chu a thi tawh tih ka hriaa, a thihni-a kan kal, a ruang chunga mi an tah nasatzia etc etc. ka sawipui a. “Ka rawn hmu vek che u alawm mahse hmun pakhat kan thlen hnuah min hruaituten lei lam hawi an phal ta lo” a ti. St.Paul’s School Compound-ah kan kal dun zel a, a thih hnua a chhungte hnaivai thi (a pu leh an chhung hnai, hmeichhe naupang) alo hmuh leh hmuh loh ka zawt a. “An lo thi ve tih ka hriaa, ka pu (Kohhran Upa) awmna leh ka awmna a inang lova, ka hmu lo” a ti! Chu veleh nang khawnge i awm? ka ti a. Min chhanna chu ka rap a, mak ka ti tak zet! “Ka pu chu Isua awmnaah awm turin a kal tih ka hria a,” a ti.
Chutah nang khawnge i awm? ka tih chuan “Setana leh a pawlte awmna hmun chu ka awmna tur a ni a, mi tam tak an lo kal dawn avangin lo buatsaih tura tirh chhuah kan ni. Ka thih ni atang khan chawlh reng ka hmu lo” a ti.(A hmel ka hmuh dan pawh a cher kuam a) “Lz,(min koh dan) nangin engtikah nge khawvel i rawn chhuahsan ve ang”tiin mi zawt a. “Kei chu Isua neitu ka ni a, lo thi pawh ni ila nang nen chuan kan inhmu thei dawn lo a nih chu” ka ti a. “Khawi maw i kut mi en tir teh” a ti a. Ka kutphah a en chuan “Nang chuan chhinchiahna i nei a nih hi” a ti a. Ka thangharh chu ka rilru hi a na vawng vawng a, ka tawngtai a “Lalpa mitthi tan tawngtaisak hian awmzia a neih hlauh chuan ka thianpa hi ngaidam la vanramah i hnenah chentir lul rawh tiin mittui tla zawih zawihin ka tawngtai. Mumang mai mai a ni naa mi tihrehawm rei khawp mai! Theihnghilh vang vang ka duh tawh tak zet a ni.
3. Room-ah ka lo hnar nasa: Zan mutnaa hnar (Snore) hi mi tam tak chin dan a ni a, thil mak ani hran lo! Mahse kha mi zana ka hnar kha chu a hria ten min hlauhpuia rilru nuam lo takin an awm. Hemi ni (chhunah) Police leh University zirlai an intibuai a, an intawng nasa mai a. Zirlaite lungawilo-in thuneitute-ah phut an nei a, an lungawilohna lan tirin Line Bus (Airport-a kal tur) Gauhati University Campus-ah an lo dang a. Sawrkar lamin Police eng emaw zat an rawntir a. Chung Police leh zirlaite chu an intibuai nasa maia – zirlaiin lungin an vawm nasa hle! Police thinrimin a hnaivaia mipa hostel awm an run (raid) ta chiam a, lo biru/inthiarfihlim hman lo kan thianpa (mizo fel tak pawh an man a, an vua a) lock up-ah an dah zui ta hial. (Kha hostel-ah khan kan dil angin Seat min lo pe ngat se chu man or vuak leh lung in/lock up-a dah ka ni ve mai thei). Hostel hla deuh (ka iai tak) a Seat min pe kha ka tan a lo tha tih ka hre hnuhnawh a ni.
“Police ho zanah an lo kal leh dawn hostel hrang hrang an rawn raid leh dawn” an ti a. Pan tur hria leh riah bona hria eng emaw zat he mi zan hian an riak chhuak a. Ka tih ngaihna hre lo chuan kan chawchhum (cook) ho hnenah “Ka room-ah hian pawn lamah min kalh khum ula, ka mu ang. Zingah ka koh hunah che u min rawn hawn dawn nia” ka ti a. Min kalh hnan ka han mu ta chu ka lo hnar nasa ta mai a! Cook ho chuan Police an lo kal vaih chuan room chhungah mi an awm tih an hre ngei anga Lianzela tan chuan a va tha dawn lo em an lo ti an lo ti a ni awm e. Anni an lo hlau mangang a, kei lah ka lo hnar bur bur si! Vanneihthlakin Police an lo kal lo, kan hostel awmna a va falin a hla deuh bawk a, he mi tum buainaah hian kan him hlauh! Ka thlan loh hostel kha ka himna tura chung lamin mi ruatsak a lo ni!
4. Exam laia inhal hlum: A tuka kan exam tur paper zirin room-ah kan hmanhlel hle a. Tukverha kan hawi chhuak chuan zirlai phawklek tak, phun sup sup ka hmu a! News eng emaw tak a awm anih ringin ka zu zawt a (dar 11AM vel chauh a la ni). Anni chuan hmeichhe pakhat MA/MSC Statistics zir, examnaah a entawn lai an man a an haw tir a. ‘Calm’ deuhin a chhuak a, hostel-ah lutin a inkalh khum a, khawnvartuia inleihin a inhal hlum tiin an sawi. An sawi zelnaah lehkha thiam thei pangngai tak a ni a, BA-ah pawh an Subject-ah 3-na lai a ni, a pa pawh College pakhata Vice Principal ni lai an ti nghe nghe. Hetiang thu thinthawng tak hriat hnu chuan tui taka lehkha zir zui a har hle! Vaiho an insawithaih a an phawklek laklawh a, a thla a hrang a, hmeichhe kang ut ruam hmeichhe hostel compound-ah an hmu thin te an ti a. Dawih deuhho chuan hrehawm an tiin an hostel compound-a kal vel an hlau hle! Lal Isua tel lova lehkha zir – Lal Isua tel lova hlawhtlin tum a va ho em tih he nula inhalhlum hian min hriat chiantir khawp mai!
5. Bobby Movie en kan tum ve ngial a: Kum 1973 vela an release Bobby Film/Movie kha 1974 kha chuan a lar vet vet khawp a, Gauhati Cinema Hall tinah an chhuah tih mai tur a ni. A film chungchang kha ‘Talk of the town’ a ni a, a film hla kha hmun tinah an ‘play’ tih mai tur a ni! Keini thianzaho kha kan ‘conservative’ viau emaw ni Cinema en kan sawi larlo khawp a. Mahse Bobby Film chu en ho ang u kan ti ve ngial a. Class atanga chhuakin kan thianpa room-ah kan innghak khawm a. Kan kim ta a, kal tawh mai tura kan awm tawh laiin kan thianpa (a hnua Pastor ni ta ngei) chuan “Ka rilru a inthiam tlat lo! Isuan Pharisai ho a zilhna – midangte hnena tih loh tur an zirtir anmahni ngeiin an bawhchhiat leh si a sawi kha a lang tlat” a ti a. Chuti na na na chu Cinema chu en leh lo mai ang kan ti ta! Kan hlim phian tho Bobby Film en lo mah ila!
6. |awngtai turin Naga tlangvalin min ko: RCC 3 Hostel-a awm ve (boarder ni ve) keini aia senior (MA Final zirlai) Naga, a hming ‘Ngulie’ zan khat chu ka room-ah a lo kal a. Ani hi pa te lam deuh, fel ang reng, mi duhtui, a lehlamah chuan mi sawisel peih (judgemental) ang reng tak a ni! “Brother Zela (min koh dan) thlarau sualin min tibuai nasa a, nizan pawh ka mu tha thei lo. Hei zanin pawh hian an lo kal leh tan a, tukverhah te an lo dak tan leh tuam tuam tawh, lo kal la min tawngtai teh” a rawn ti a. Ka insit kher mai! Tu nge maw ka nih a, sap tawnga tawngtai tur phei chuan … Ka huphurh tak zet. Mahse kei akar min ko tlat si!
Pathian rin chhanin, hlau leh khur chung (mahni insit)in ka kal ta a. Bible ka chhiar a, a lu chungah kut nghatin ka tawngtai a. Rei vak lo hnu chuan ka chhuahsan a, ka mu zui ta. A tuk zingah Ngulie-a chu alo kal a lawmthu a rawn sawi a, tui takin ka mu, thlarau sualin min tibuai lo a ti. Lalpa hnathawh a ropui ka ti tak zet!
7. Exam hnai tawhah Crusade-a Counsellor ni turin min sawm 1970’s chho velah khan Shillong Mizo Kohhranah kum tin Crusade an nei thin a.
MA Final Exam kan neih hnaih tawh lamah Shillong-ah Crusade an neih turah Tv. Vanlalnghaka (tuna Rev.Dr. Vanlalnghaka ni ta hian) Mizo P.G. zirlai eng emaw zat Counsellor atan min sawm hlawm a. Ka thiante chuan exam a hnai tawh em mai ka pha dawn an ti hlawm a. Ka pha ngam chiah si lo, ka aw ngam mai bawk si lo, ka rilru a buai ta khawp mai! Pathian duh loh zawngin decision ka siam ang tih ka hlau a ni ber. Ka thiante ka en a, anni pawn ‘No’ an tih chuan tih ve mai tur em ni ka ti. Mahse ka rilru a dam chiah si lo! Ka room atangin zan thla engah Engineering College Road-ah rilru tawngtai chungin ka phei a. Lungpui (kawngsir a mi) chungah ka thu a, tih tak zeta tawngtaiin “Lalpa ka thiante en lovin i thu-in Crusade-ah chuan ka kal ang. Ka exam turah i thu thu ni rawh se” ka ti a. Ka hahdam ta huai a. Shillong-ah chuan ka kal ta ngei a, ka group ami pakhat ka counsel chuan ka inhmuh chhuahna Bible chang chiah kha inhmuh chhuah nan (testimonial verse-ah)a hmang a nih chu! Pathian thil rel dan hi a va mak thin em! A hnuah kan exam lah ka beisei phak loh, ka phu loh result ka nei ta! Lalpa ropui ber mawlh rawh se!
8. Scholarship Source 2 atangin min grant: Thil engmah a chian loh rih avangin Scholarship hmun 2 atangin ka dil a. Dan ang chuan Scholarship hi hmun khat (Source khat) atang chauha hmuh phal a ni. Pakhat chu Mizoram sawrkar atanga Post Matric Tribal Scholarship ka dil a ni a, a dang erawh UGC atanga Tribal Student graduate exam-a titha deuhin an dil ang chi a ni. Hostel-a zing ka tho chu tuk dang ang bawkin, fianrialah Pathian ka pawl (Quiet time ka hmang) a. Thufingte bung 22:1 “Sum tam tak aiin hmingthat hi thlan zawk tur a ni a, Tangka leh rangkachak aiin duhsakna a ngainatawm” tih hi ka chhiar fuh a. Chaw ei kham chuan class kal turin ka chhuak a. Department ka thlen chuan thianten Scholarship alo thleng a, a lak theih thu min hrilh a. Administrative Building-a kan Scholarship ‘deal’ tu ka hmuh chuan Source hnih atanga Scholarship ka hmuh thu min hrilh a. Source hnih atanga lak chu danin a phal lo tih ka hriaa, chutih laiin ‘dealing clerk’ pawisa pe ve a, source hnih atanga Scholarship la an awm ka hre bawk. Sum lama kan chhungkua kan harsatzia ka hrechiang a, sum ka mamawhzia pawh ka hria! Mahse zinga Thufingte ka chhiar kha Pathian min pek tih ka chiang bawk si a, rinawm ka thlang ta (harsa ti takin)! Mahse khami tuma ka thutlukna (decision) kha tun thlengin ka tifuh ka la ti reng.
9. Room No.13-ah record siam a ni hlauh: Gauhati University-a kan zirlai hian P.G exam hi darkar 4 exam thin a ni a, zawhna 5 chhang turin, zawhna pakhatah minute 45 vel hman theih a ni. Note kan siam hian minute 45 chhunga ziah hman tawk tur milin siam kan tum a; chutianga ziak hman turin ka roommate nen kan writing speed kan test thin.
MA Final exam dawna kan lehkha zir, mahni dawhkan ve vea kan bur char char chu ka thianpa Sangchema chuan “Zela ka dik hauh lo mai, ka thluak a chawl – a ‘function’ lo ka thiamsa ka theihnghilh vek, engmah “ka ngaihtuah chhuak thei tawh lo” a ti a. Anih tak chu, zu inti harh ila, boruak tha (fresh air) dawngin thingpui in ila, i ‘normal’ leh mai ang ka ti a. Rei lo te kan zu in tih harh chuan ‘normal’ a inti ve leh ta a. Ni 2 emaw hnuah chuan lehkha kan zir dun leh malh malh lai chuan ka tal buai ve ta, ka thluak a ‘function’ lo, ka thiamsa kha ziak chhin tura ka ngaihtuah dawnin a bo vek!
Buaithlak tak a ni! Ka thianpa-in a hma nia kan tihdanin min hruai chhuak a, kan zu in ‘refresh’ hnu-in ka ‘normal’ ve leh ta.
MA kum khatna result a chhuahin H.Sangchema Political Science-ah 1-na a ni a, kei Economics-ah 2-na ka ni thung. MA Final kan tan dawnin vai thiante (min duhsaktuten) in room hi thlak rawh u, Room No.13 Unlucky No. a ni, in Final Result-in a tuar ang an ti a. Hetiang thil Luck/Luck loh tih ang reng kan ring lo, Van Pathian thu thu a ni ka/kan ti mai thin. MA Final result(1975) a chhuah chuan Pathian vang liau liau-in keini RCC 3 Hostel Room no.13-a awm (roommate)te chu kan Department ve vea First Class First ni ve ve-in Gold Medal kan la ve ve ta a ni. H. Sangcheman Gold Medal, Political Science-ah a la a, keiin Economics-ah, Room Mate Gold Medal a ruala dawng ve ve hi kan hun lai khan ‘record’ a nih hmel a, tun hnuah pawh thil vang tak chu a nih tho hmel. Keini thiandun hian Pathian thatna zar kan zo nasa teh ania!