Hotel leh restaurant-a ualau taka zu chelekna enzui dawn

Aizawla hotel leh restaurant thenkhata ualau taka zu chelek nia sawi chu Excise & Narcotics Department chuan enzui a tum.
Excise & Narcotics minister Lalnghinglova Hmar hoin an department hotute leh Central YMA hruaitute chu zu leh ruihhlo do kawnga hmalak dun dan tur sawiin Ningani khan an thukhawm a. Heta thu sawitu Excise & Narcotics commissioner Z Lalhmangaiha chuan tunhnaia Burma ram buai vanga raltlante avangin Phunchawng leh a chhehvela zu siam a pun bakah Aizawl hmun hrang hranga hotel leh restaurant thenkhata ualau taka zu chelek thin an awm nia sawi pawh enzui a ni dawn tih a sawi.
Zu leh ruihhlo do kawngah Central YMA emaw pawl dang pawh an department-in a thawhpui zel thei tih a sawi bawk.
Central YMA president Lalhmachhuana chuan zu leh ruihhlo hluar zel chu mipuiin ngaia an neih mai a hlauhawm avangin hetianga khawsate hian hlauh an neih a tul a. Zu leh ruihhlo laka fihlimna tur thu leh khuahkhirhna thu hi a tam thei ang ber mipui hriata puanzar a ngai, tiin a sawi a ni.
Excise & Narcotics minister chuan Mizoramin zu leh ruihhlo vangin a tuar nasa tawh a, hemi do tur hian an department lehCentral YMA chuan hma lak dun zel a pawimawh a, hmun hrang hrang atanga zu leh ruihhlo rawn lut tur dan thu-ah leh a dapchhuahnaah thawkho zelin, YMA bakah sawrkar department dang, kohhran hruaitute pawh thawhpui zel an ni dawn tih a sawi.
Ruihhlo dona chungchanga inkawmkhawmnaah hian Excise & Narcotics department leh Central YMA hnuaia Kumpuan Committee hmalakna report a ni bawk.