JC.Zoremi Hmar Joute
-- Advertisement --
He thawnthu bu ngaihnawm zet hi bung hrang sawmthum leh panga-a then a ni a, a kawma milem, nula leh tlangval lungchim taka infawp lai leh hotel niawm tak in ropui zet han hmuh hian mi a lêmin a hip nghal zar mai a, phek 282-a chhah niin a ziak a sin lutuk lo va. a hraw lutuk lo bawk a, a chhiar nuam tawk kan tih ang hi niin chhiar paha han lek vel pawh a nuam khawp mai.
A bu chhung han luh phat hian he lehkhabu-a a changtupa ber tur Lalawmpuia hmelhriattir kan ni a, a nau Malsawmkimi pawh Matric first division-a a pass ve mek thu leh an unaua phai lama lehkha zir tura vai liam an nih thu te a ni a, Malsawmkimi chu a duhna ber college New Delhi lamah zir zawmtir tur a ni a, a puin a zilhna hnam dang pasala neih loh tur thu chu a vawng reng a. A u zawk Awmpuia erawh Darjeeling-ah a awm thung. An unau chuan an college ve ve-ah pawh a thiam thei pawl niin an chhuanawmzia leh, hnam dang tan pawha tluk loh rim an namzia te kan hmu chho zel a, infiamna lamah pawh an duai lo unau viau a ni.
Lalawmpuia hmel leh pianzia a sawi atang hian a tak ni mai awma mawi niin, hmuh chakawm em emah a ziaktu hian a chhuah thiam a, a takah hmuh tur awm lo mah se mitthlaah tlangval lian thelh thawlh, hmeltha leh pian thiam a lo lang a; a nau Malsawmkimi(Maski) hlei hlei hi hmuh a tichakawm thiam. Mitthlaah tho Mizo nula ngo lampang, te chhe lo leh ngo var mai, sam tle sar thlah hnáp mai, hmeltha leh pian nalh si a lo lang ve leh tho mai.
Awmpuia te college-in freshers day an hman ni-a a duhthusam nula a tawn chu Nepali nula a ni tlat mai le! A tir te atang hian a hmeichhia hian a melh no hmasa deuh ti tih a… Harsatna neuh neuh tam tak kara hnam dang nula hmangaih tlat chu buaithlak chang a tam ta mai a, chu nula Maya lah a chi pui ten an hêlin an veh ve reng a, nula hmeltha leh pian nalh eltiangin a hnampui aia Mizo tlangval a thlang tlat mai te chuan thikna nena tangkawpin an nunna atana hlauhawm khawpa beih hial an tawk ta zeuh zeuh mai le!
Zum leh hriam karah, Tuboh leh Dolung kara leng ni maia mawi an nih laiin an inkara hmangaihna erawh a zual sauh emaw tih mai tur hi a ni a, a tu ve ve pawh an chhel fan fan hle a ni. Chhhunga’n Maya hmel thatzia a sawi dan hi uar lua si lovah chuan mitthlaa lo lang nula chu ria chum bat, hnar zum nalh tawk chiah, mitmeng mawi leh ngo var mai, pianthiam zet a ni leh tho mai. Maya hi Darjeeling mi lian fanu niin, a hmelthat leh pian nalh em vanga chhungkuaa an chhuan rawn, an duat sual zawh loh a ni a, en tawh pawha en nawn leh ngai kan tih ang hi a ni. Awmpuia lah mipa ah pawh pa tak mai chi a niin, hmeichhia a duhna a tilang huam huam ngai lo va, chutiang mipa ngeng ngalh mai chuan hmeichhiate hi min hip zawk fo reng a, Maya pawhin atchilh bur mai a ni. (Kei pawhin ka star!)
Maya lo ngaizawng ve tu Dhyan-a phei chuan Awmpuia hi a thik em em a, a zu ruiin a cho vei khanglang a, Awmpuia chuan a lo shock nghek ta zawk a; hetia an insual buai lai vel chhiar lai hi chuan kezungpui kawm meuha lo tan ve awl tak a ni! A bu chhungah hian tum li vel insual buaina thleng a awm a, A ziaktu hian a thiam em avangin an insual laiah pawh mitthla min hruai a, a taka en ang maia fiahin a ziak thiam a, hei hi thu thiam fe tan lo chuan thil har tak a ni. Tehkhin thu kan tih ang te, tawng upa kan tih mai ang chi te hi a hmang sual tha duh miah lo mai a, dik leh dak thlarhin a ziak chat chat mai a, hei pawh hi mi nazawng tih chi a nih lohzia a tilangin ka hria.
A hmun hma engkim hi a tak ang thlap a ni a, hmun thenkhat phei hi chu a mah Chhunga ngeiin a tlawh chhuak nghe nghe. A Mizo tawng hman thu inla lawn nalh lutuk leh belhchian dawl em em hian he Hotel Shangrila hi a tiphuisui tak meuh a; seltu tan sel bo a ni lo nain lehkhabu hlu tak a nih dan erawh tu’n kan hai lovang; chhiar dêk tawh chuan dah leh mai a harsa talh tawh a, eng dang dawn lo lêka bih ngar ngar mai awl deuh a ni.
Hnam hrang, ram hrang kara hmangaihna lo piang chhuak, a kuhmum ang a, par chhuak lovin a vuai mai ang tih hlauhna nen thin phu dep depin kan chhiar a, an inkar tihchhiat tum reng renga phe sek tam tak kara Maya leh Awmpuia inhmangaihna nghet tlat mai hian chhiar a tinuam a, kan lo tang ve em em ringawt zel mai a ni. Awmpuia te unau lah an college-ah ve ve an lâr em em a, hnam dang zingah pawh langsar larh an nih bakah, a ziaktu hian kristian sakhua leh tawngtaina a chawisang thiamin, uar hluah si lo hian a zep tel leh zauh thin a, hei hian a thawnthu a tihlu zual ka ti lo thei lo.
Mizo ten rohlu kan neihte zinga hlu ber pawl, tlawmngaihna kan ngahzia a tilang thiam em em a, hnam dangte mak tih khawpa Mizo tlangval a han tlawmngai te hi ka lo chhuangin nuam ka lo ti veng veng mai; chu pawh amah haw em em tu leh velh tuma beitu fanu tan lehnghal! A ziaktu hian hnam leh khawtlang a veizia leh kan zo nun ze mawi a veizia a lang a, Maya pawhin Mizo tlangval Awmpuia chu a hmangaih piah lamah a ngaisang ru veng veng dawn tih hriat reng.
Hnam hrang leh ram hrang kara hmangaihna kuhmum chu vuai mai lovin a lo par chhuak ta nge nge a, Maya nu leh pa ngei pawhin dan an tum em em laiin Maya ruak lo/naupai chuan Aizawla Awmpuia te ina lut rawih mai turin a chho ta a, nau pai a nih thu te Awmpuia nu Pi Maruatin a lo hriat chuan a lo lawm thiam em em a, a lo pawm hmiah mai a ni. Awmpuia leh Maya chuan an harsatna hrang hrang chu hnehin an innei ta hial mai, hah an va tidam sawng sawng tak em!
Pu Chhunga hian Mizo tawng a thiamin novelist tha eltiang a nihzia a rawn tilang ni berin ka hria. A thu ziak reng reng hi a flow a mam a, chu chuan chhiar a tinuam em em mai a ni. Thu ziak tam tak chu paragraph pumah eng nge an sawi a, eng nge sawi an tum hriat mang loh te hi an ni hlawm a, an thil sawi a pherh a, a chhum bung rem rum thin. Chhunga lehkhabuah erawh a fiahin a fel thlap a, eng nge a sawi tum tih chu sawi loh, mithlain a duhna hmun hmunah min hruaiin min keuh thlu leh nge nge thin!
Lalawmpuia, Maya leh Maski te, Pu Sanga leh Maruati, Sunita leh midangte…han chhiar zawh meuh chuan lung an tileng ruih thei alawm le! Hotel Shangrila chhiar chuan a hmasa pahnih, ‘Phuba’ tih leh ‘Rose of goodbye’ chhiar a chawh a; chutih rualin a bu hmasa pahnih la chhiar miah lo tan pawh ngaihawm em em tho a nihna lai hi a ziaktupa them thiamzia lanna a ni. A hmasa pahnih chhiar loh vanga bangbona tur awm miah lovin min lenpui delh delh tho mai a, mibik a nihna lanna a ni.
A tawp berah chuan hei, krismas te a hnai a, he lehkhabu Hotel Shangrila hi i chhiar tur mai ni lo, i duhsak zawng ten krismas hlim taka an hman theih nan present atan lei kep la, rs 300 lekin midangte hlimna thlen ve rawh le. CL.=hianga & sons Bazar Bungkawnah lei tur a awm. A chhut tam loh avangin i chang lo palh ang e, lei thuai rawh!