House-ah hmunphiah sawi leh

Assembly Session neih mekah Zirtawpni khan hmunphiah hralhna chungchang sawichhuah leh a ni.
South Tuipui bialtu MLA Jeje Lalpekhlua private resolution – “Ni 100 chhunga tihhlawhtlin tur sawrkarin a lo duan lawk tih hlawhtlin a ni chho zel hi lawmawm ka ti” tih sawihonaah leader of the opposition Lalchhandama Ralte chuan, Session tan nia larsap thusawiah a sawrkarin hmunphiah a lei dawn tih a sawi a. Sawrkar kum tharah lei a sawi lo tih sawiin, tunah a hralhna hriat loh vangin hmunphiah chingtute an rum mek a, sawrkarin mawhphurhna a la ngam lo tih a sawi.
Sawrkar thil tihah an lawm lo vek lam niloin, tuna tihhlawhtlin tawh hoah kut ben hluah hluah na tham tling lo a awm nual tih a sawi a. Year of consolidation chu a thu chuan a tha a, minister car thar lei loh pawh tih pawh, car hi a that lai hun chhunga sawi kum 10 a ni a, MNF sawrkarin a lei chhan chu Congress kum 10 sawrkarin a hman tawh a chhawm vang a ni a, tunah chuan term khat chauh ala liam avangin car thar lei hun a la ni lo tih a sawi.
Minister leh CM ten motor pakhat chauh kawl tura insawi siin pakhat chauh an kawl em tih enchiang tura chahin, “In thenawm ten lo en se,” a ti.
Thildangah pawh sum ren lohna a awm nial tih sawiin, Board leh thildang an din danah MLA rual an awl thep thup laiin political party atanga an mite tihlawmna, ‘political accomodation’ atana an hmang chu a dik lo tih Lalchhamdama Ralte hian a sawi.
Chief minister Lalduhoma chuan tunhma in hmunphiah chu mahal a ni thin a, rate sang zawka lei duh awm mah se, mahalder hoin rate an khuahkhirh a, hei vang hian mahal system hi an do thin tih a sawi. Mahal system tihtawp hnu ah free market tia kalpui ni mah se, duh duh an rawn mahalder leh tho a, kuminah hetiang dinhmuna hmunphiah chingtute an awm leh chu pawi an tih thu a sawi. Hmunphiah ching peih lo chu a bengchheng zawk tih a sawi bawk.
“Experience kan nei ta a, kan zirlaiah kan ngai. Kumtharah chuan empanel buyer kan siam dawn a, an ni nen a rate kan siam anga, kan rate anga an lak ngam loh chuan an ngamna tawkin, chumi inkarah chuan support price-in kan hnawhkhat anga, pawisa kan dahlawk vek a ni. Kan empanel buyer-te chauh transit pass kan pe anga, an ni lo chuan Mizoram pawnah an chhuahpui thei dawn lo. Chutiang chuan kan khuahkhirh tawh dawn,” a ti.
Car that chhunga sawi chu kum 15 zawk a ni tih chief minister hian sawiin, a ral hma in a thar an lei tih sawichhuahna remchang siamsak a ni chu a lawm hle tih a sawi a ni.