House-ah thudik famkim lo hmanga zawhna chhan a awm – Robert Romawia

House-ah thudik famkim lo
hmanga zawhna chhan a awm
– Robert Romawia
Tunhnaia Assembly Session neihah Mizoram history-a la awm ngai lo, thudik famkim loa zawhna chhan a awm nual nia a lan thu MLA Robert Romawia Royte chuan a sawi.
Zirtawpnia Mizo Hnam Runa inkhawmah MNF Thalai president ni bawk Robert Romawia hian, MNF ministry-ah chuan minister-te’n Assembly Session-a MLA-te ziaka zawhna chhan loh leh chhan hman loh hlauin mawng vawmba ang maia an chet char char thin laiin, ZPM ministry-ah erawh minister-te an tuan a fumin zawhna chhan an hreh viau nge, zawhna chhan loh leh chhan tlai a tam hle tih a sawi.
“Zawhna chhan loh an neih nual bakah Mizoram history-a la thleng ngai lo, thudik famkim loa zawhna chhan a awm nual niin a lang a. Assembly documents hmangin dawt thar tam tak kan hriat belh a, kan umzui zel dawn,” a ti.
Rin loh taka ZPM sawrkarin Forest (Conservation) Amendment Act 2023 an duh thar thut chhan chu hriat thiam a har tih a sawi a. Sawrkar laipui tlawnna chikhat langchhuak nia a lan thu a sawi.
“ZPM hotute hian central hotute pangpar, Zothuam chi hrang hrang leh mimal thlalaktea tlawna tih lawm an tum thin a, an hlawhchham zel tak hnuah BJP hotute tihlawm tumin Mizo hnam tana pawi tak FCAA 2023 pawmna resolution hmanga tlawn lungawi an tum em ni,” Robert Romawia Royte hian a ti.
Chief minister Pu Lalduhoma’n Independence Day speech-ah thudik tawk lo a sawi nia sawiin, sawrkarin open balance a ngah thute, financial year tawpa sum an la neih teuh thu a sawite chu uluk taka zirchian a nih hnu ah, contractor leh supplier leh hnathawktute bill hrang hrang a huna pechhuak loa an la kawl tânte, SASCI loan an la pek chhuah loh avangtea unspent balance leh unutilized balance la awm vang mai mai chauh a ni tih MNF MLA hian a sawi.
“Kum hmasa lama hman zawh vek tur, Finance department-a an kawl rei sum, sawrkar kumthara sum thar hman tur anga CM-in a sawi kha thudik ziktluak lo a ni,” a ti.